- కత్తితో పొడవడంతో చికిత్స పొందుతూ మృతి
- నిజామాబాద్ సిటీలో విషాదం
నిజామాబాద్, వెలుగు : తన కొడుకును కొట్టి గాయపర్చాడని కోపం పెంచుకున్న ఓ తల్లి అతడిని కత్తితో పొడిచి చంపింది. కొడుకు గురించి చులకనగా మాట్లాడుతూ తరచూ గొడవ పెట్టుకుంటున్నాడని ఆగ్రహంతో ఈ పని చేసింది. నిజామాబాద్ త్రీ టౌన్ఎస్ఐ ప్రవీణ్కథనం ప్రకారం.. నిజామాబాద్లోని గౌతమ్నగర్కు చెందిన పవన్, చిన్ను, చందు ఫ్రెండ్స్.
20 ఏండ్ల వయస్సున్న వీరు పెయిటింగ్ తదితర పనులు చేసుకుంటూ ఉపాధి పొందుతున్నారు. ఒక్కొక్కరు వారానికి ఒకసారి మందు పార్టీ ఇవ్వాలనే షరతు పెట్టుకొని ఆరు నెలల నుంచి కొనసాగిస్తున్నారు. ఆదివారం పవన్ వంతు రావడంతో చిన్ను, చందు వెళ్లి అడగ్గా తన దగ్గర పైసలు లేవని చెప్పాడు. దీంతో ముగ్గురి మధ్య గొడవ జరగ్గా పవన్, చిన్నుకు చిన్నపాటి గాయాలయ్యాయి.
గాయాలతో ఇంటికొచ్చిన కొడుకు చిన్నును చూసిన అతడి తల్లి రేణుక కోపంతో పవన్ వద్దకు చందును తీసుకువెళ్లింది. అంతకు ముందు కూడా చాలాసార్లు కొట్టావని కుటుంబీకుల ముందు ప్రశ్నిస్తూనే వెంట తెచ్చుకున్న కత్తితో కడుపులో పొడిచింది. రక్తం కారి కుప్పకూలిన పవన్ను జీజీహెచ్ హాస్పిటల్లో చేర్పించగా, ట్రీట్మెంట్పొందుతూ ఆదివారం రాత్రి చనిపోయాడు. రేణుక, ఆమె కొడుకు చిన్న, స్నేహితుడు చందుపై హత్య కేసు నమోదు చేశారు. పరారీలో ఉన్న నిందితుల కోసం గాలిస్తున్నట్లు ఎస్ఐ తెలిపారు.
