ప్రేమకథలకు తెలుగు ప్రేక్షకులు ఎప్పుడూ బ్రహ్మరథం పడతారు. అదే కోవలో మనసును తాకే భావోద్వేగాలతో, అద్భుతమైన సంగీతంతో తెరకెక్కిన చిత్రం 'నిలవే'. సౌమిత్ పోలాడి హీరోగా నటిస్తూ సాయి కే వెన్నంతో కలిసి దర్శకత్వం వహించిన ఈ చిత్రం, ఫిబ్రవరి 13న గ్రాండ్గా విడుదల కానుంది. ఈ సందర్భంగా బుధవారం మాదాపూర్లో జరిగిన ప్రీ-రిలీజ్ ఈవెంట్ చిత్ర యూనిట్లో కొత్త ఉత్సాహాన్ని నింపింది.
సునీత ప్రశంసలు.. కీరవాణి అండ
ఈ వేడుకకు ముఖ్య అతిథిగా విచ్చేసిన ప్రముఖ సింగర్ సునీత. ఆమె మాట్లాడుతూ.. ఈ మధ్య కాలంలో అన్నీ ఎమోషన్స్ ఉన్న క్లాసిక్ లవ్ స్టోరీని చూడటం అరుదైపోయింది. 'సఖి', 'ఏ మాయే చేశావే' వంటి ఫీల్ గుడ్ చిత్రాల సరసన 'నిలవే' నిలుస్తుంది. ఆస్కార్ విజేత కీరవాణి కూడా ఈ పాటలు విని ప్రమోషన్ చేయడం సినిమాకు పెద్ద ప్లస్" అని కొనియాడారు.
లవ్ స్టోరీస్ లో 'కేజీఎఫ్' వంటిది!
హీరో సౌమిత్ పోలాడి ఈ చిత్రంపై ధీమా వ్యక్తం చేస్తూ.. యాక్షన్ సినిమాల్లో కేజీఎఫ్ ఎలాంటి ఇంపాక్ట్ క్రియేట్ చేసిందో, ప్రేమకథల్లో 'నిలవే' అలాంటి ఇంపాక్ట్ చూపిస్తుంది అని అన్నారు. మెగాస్టార్ చిరంజీవి స్ఫూర్తితో నటుడైన తనకు, ఈ సినిమా తొలి విజయమవుతుందని ఆశాభావం వ్యక్తం చేశారు. ఇక దర్శకుడు సాయి కే వెన్నం మాట్లాడుతూ, సందీప్ రెడ్డి వంగా మాటలు తనలో స్ఫూర్తిని నింపాయని, కంటెంట్ను నమ్మి తీసిన ఈ సినిమా ప్రేక్షకులను ఖచ్చితంగా ఆకట్టుకుంటుందని తెలిపారు.
11 పాటలతో మ్యూజికల్ వండర్
మ్యూజిక్ డైరెక్టర్ కళ్యాణ్ నాయక్ ఈ చిత్రంలో 11 అద్భుతమైన పాటలను అందించారు. కథలో భాగంగానే సాగే ఈ పాటలు యువతను కట్టిపడేస్తాయని చిత్ర యూనిట్ తెలిపింది. శ్రేయాసి సేన్ కథానాయికగా పరిచయం అవుతుండగా.. హర్ష చెముడు, సుప్రియా ఐసోలా ఇతర ముఖ్య పాత్రల్లో మెప్పించనున్నారు. POV ఆర్ట్స్ ప్రొడక్షన్స్ నిర్మించిన ఈ చిత్రం, సరికొత్త POV టెక్నిక్తో, స్వచ్ఛమైన ప్రేమకథగా ప్రేక్షకుల ముందుకు రాబోతోంది. ఇప్పటికే వేసిన ప్రీమియర్ షోలకు పాజిటివ్ రెస్పాన్స్ రావడంతో మూవీ టీమ్ ఫుల్ ఖుషీగా ఉంది.
