కర్ణాటక సీఎం కుర్చీ మార్పు పంచాయితీకి తెర

•     కాంగ్రెస్​ హైకమాండ్​ ఆదేశాల మేరకు సమావేశం
•     తమ మధ్య సంబంధాలు బాగానే ఉన్నాయని సంకేతాలు
•     రాష్ట్ర ప్రయోజనాల పైనే తాము చర్చించినట్టు వెల్లడి

బెంగళూరు: కర్నాటకలో కొద్దిరోజులుగా జరుగుతున్న సీఎం కుర్చీ మార్పు పంచాయితీకి తెరపడింది.  సీఎం సిద్ధరామయ్య, డిప్యూటీ సీఎం డీకే శివకుమార్​శనివారం ప్రత్యక్షంగా కలుసుకున్నారు. కాంగ్రెస్​ అధిష్టానం ఆదేశాల మేరకు బ్రేక్‌‌‌‌‌‌‌‌ఫాస్ట్​మీట్​ఏర్పాటు చేసుకున్నారు.  ఉదయం  సిద్ధరామయ్య అధికార నివాసం ‘కావేరీ’కి డీకే చేరుకున్నారు. అక్కడ ఇద్దరు నేతలు కొంతసేపు ముచ్చటించుకున్న తర్వాత కలిసి అల్పాహారం తిన్నారు. ఈ భేటీతో తమ మధ్య సంబంధాలు బాగానే ఉన్నాయనే సంకేతాలను ఇచ్చారు. పార్టీ హైకమాండ్ నిర్ణయానికి కట్టుబడి ఉంటామని తెలిపారు. రెండున్నరేండ్ల కాంగ్రెస్ ప్రభుత్వంలో నెలకొన్న ప్రతిష్టంభనకు ముగింపు పలకాలని కాంగ్రెస్ హైకమాండ్ సూచించడంతో సీఎం ఈ సమావేశాన్ని ఏర్పాటు చేశారు. సీఎం, డిప్యూటీ సీఎంల మధ్య ఆధిపత్య పోరు కొనసాగితే అవిశ్వాస తీర్మానం ప్రవేశపెడతామని ప్రతిపక్ష బీజేపీ హెచ్చరించిన నేపథ్యంలో ఈ భేటీ ప్రాధాన్యత సంతరించుకున్నది.

ఇకపై గందరగోళం ఉండదు: సిద్ధరామయ్య 

బ్రేక్‌‌‌‌‌‌‌‌ఫాస్ట్ ​మీట్​అనంతరం మీడియాతో సీఎం సిద్ధరామయ్య మాట్లాడారు. మీడియా అనవసరమైన గందరగోళం సృష్టించడం వల్లే తాను కేసీ వేణుగోపాల్‌‌‌‌‌‌‌‌ సూచనల మేరకు డీకే శికుమార్‌‌‌‌‌‌‌‌‌‌‌‌‌‌‌‌తో అల్పాహార సమావేశం నిర్వహించానని చెప్పారు. ఇకనుంచి ఎలాంటి గందరగోళం ఉండబోదని తెలిపారు. తమ మధ్య ఎలాంటి విభేదాలు లేవని, భవిష్యత్తులోనూ ఉండబోవని తేల్చిచెప్పారు. తమపై బీజేపీ, -జేడీఎస్ అసత్య ప్రచారాలు చేస్తున్నాయని మండిపడ్డారు. ప్రస్తుతం తమ పార్టీ 2028 ఎన్నికలు, స్థానిక ఎన్నికల పైనే ప్రధానంగా దృష్టిసారించిందని స్పష్టం చేశారు. 

హైకమాండ్​ ఆదేశాల ప్రకారం ముందుకెళ్తం: డీకే

రాష్ట్రంలో కాంగ్రెస్​ పార్టీని ప్రజలు ఆదరించి అధికారంలోకి తెచ్చారని, వారి నమ్మకాన్ని నిలబెట్టుకుంటామని డీకే శివకుమార్​ తెలిపారు. తమలో ఎలాంటి ముఠా తగాదాలు లేవని, హైకమాండ్ ఆదేశాల ప్రకారం ముందుకెళ్తామని చెప్పారు. నాయకత్వం విషయంలో అధిష్టానం నిర్ణయమే ఫైనల్​ అని పేర్కొన్నారు. సీఎం సిద్ధరామయ్యతో జరిగిన భేటీలో రాబోయే అసెంబ్లీ సమావేశం సహా పలు విషయాలపై చర్చించినట్టు తెలిపారు. ఇంతకాలం పార్టీ పెద్దలు తనను వేచి ఉండాలని సూచించడంతో ఎదురుచూస్తున్నానని.. ఇంకొంతకాలం కూడా వేచి ఉండడానికి సిద్ధమేనని అన్నారు. మల్లికార్జున ఖర్గే, రాహుల్​గాంధీ నాయకత్వంలోనే 
2028 ఎన్నికల బరిలో దిగుతామని చెప్పారు.