అరేఓ సాంబా.. అడుక్కునే వాడి దగ్గర గీక్కుక్కోవటం ఏంట్రా.. ఈ సినిమా డైలాగ్ ఇప్పుడు ఇండియాలో వెరీ వెరీ ఫేమస్ అయ్యింది.. ఎందుకు అంటారా.. మన గ్రేట్ బ్యాంకులు చేసిన పనికి.. అవును.. బ్యాంక్ అకౌంట్లలో.. కనీస నిల్వ.. అదేనండీ మినిమం బ్యాలెన్స్.. అంటే ఏడాదిలో 5 వేలు.. 10 వేల రూపాయల డబ్బులు కూడా లేకపోవటం.. అలాంటి బ్యాంకు ఖాతాల్లో ఫైన్స్.. జరిమానాలు వేశాయి బ్యాంకులు.. మన దేశ వ్యాప్తంగా బ్యాంకులు.. డబ్బులు లేని బ్యాంక్ ఖాతాలపై జరిమానాలు వేయటం ద్వారా.. ఎంత సంపాదించాయో తెలుసా.. అక్షరాల 8 వేల కోట్ల రూపాయలు.. ఏంటీ 8 వేల కోట్ల రూపాయలా అని అవాక్కయ్యారా.. నోరెళ్లబెట్టారా.. అవును.. ఇది పచ్చి నిజం.. ఈ పూర్తి వివరాలు తెలుసుకుందామా..
బ్యాంక్ అకౌంట్లలో మినిమం బ్యాలెన్స్ లేకపోతే ఆయా బ్యాంకులు ఖాతాదారులపై జరిమానా విధిస్తాయనే విషయం తెలిసిందే. ఇలా మినిమం బ్యాలెన్స్ లేని అకౌంట్లపై గత మూడేళ్లలో బ్యాంకులు ఎన్ని జరిమానాలు విధించాయని లోక్ సభలో ఓ ఎంపీ ప్రశ్నించారు. ఈ ప్రశ్నకు కేంద్ర ఆర్థికశాఖ సహాయమంత్రి పంకజ్చౌధరి లిఖితపూర్వక సమాధానం ఇచ్చారు.
గత మూడేళ్లలో మినిమం బ్యాలెన్స్ లేని ఖాతాదారుల నుంచి బ్యాంకులు రూ.8,092 కోట్ల ఛార్జీ వసూలు చేసినట్లు ఆయన వెల్లడించారు. 2022-23లో రూ.2,407.82 కోట్లు, 2023-24లో రూ.2,909.1 కోట్లు, 2024-25లో రూ.2,775.91 కోట్లు ఖాతాదారుల నుంచి ఫైన్ల రూపంలో బ్యాంకులు వసూల్ చేశాయని తెలిపారు. ఇవి కేవలం దేశంలోని 11 ప్రభుత్వరంగ బ్యాంక్ వసూల్ చేసిన చార్జీలే.
హెచ్డీఎఫ్సీ, ఐసీఐసీఐ, కోటక్ వంటి ప్రైవేట్ సెక్టార్ బ్యాంకులు వసూల్ చేసిన ఛార్జీలు ఇందుకు అదనం. ఇక, ఖాతాదారులకు బ్యాంక్ కార్యకలాపాలకు సంబంధించిన ఎస్ఎంఎస్లు పంపినందుకు రుసుముల కింద రూ.3,387 కోట్లు వసూలు చేసినట్లు తెలిపారు. 2022-23లో రూ.1,193.19 కోట్లు, 2023-24లో రూ.976.98 కోట్లు, 2024-25లో రూ.1,217.6 కోట్ల ఛార్జీలను బ్యాంకులు వసూలు చేసినట్లు వివరించారు.
