బూర్గంపహాడ్, వెలుగు: రైతుల సంక్షేమమే ప్రజాప్రభుత్వ ప్రధాన లక్ష్యమని పినపాక ఎమ్మెల్యే పాయం వెంకటేశ్వర్లు అన్నారు. భద్రాద్రి కొత్తగూడెం జిల్లా బూర్గంపహాడ్ మండలం నకిరిపేట పరిధిలోని దోమలవాగు నుంచి దిగువనున్న పంటపొలాలకు బుధవారం ఆయన సాగునీటిని విడుదల చేశారు.
ఈ సందర్భంగా ఆయన మాట్లాడుతూ దోమలవాగు నుంచి సాగునీరు విడుదలతో లక్ష్మీపురం, సంజీవరెడ్డిపాలెం, బూర్గంఫహాడ్, మొరంపల్లి బంజర, నకిరిపేట, గోపాలపురం, పోలవరం, కొమ్ము నకిరిపేట, వేపలగడ్డ గ్రామాల పరిధిలోని సుమారు 700 నుంచి 800 ఎకరాల భూములకు సాగునీరు అందుతుందన్నారు. కార్యక్రమంలో కాంగ్రెస్ మండలాధ్యక్షుడు దుగ్గెంపూడి కృష్ణారెడ్ది, మాజీ సొసైటీ అధ్యక్షుడు పోతిరెడ్ది వెంకటేశ్వర రెడ్ది తదితరులు పాల్గొన్నారు.
