అన్నపురెడ్డిపల్లి, వెలుగు: ఇరవై ఏళ్లుగా సాగు చేస్తున్న పోడు భూములను వదులుకునే ప్రసక్తే లేదని పోడు రైతులు తేల్చిచెప్పారు. భద్రాద్రి కొత్తగూడెం జిల్లా అన్నపురెడ్డిపల్లి మండలం మద్దుకూరు బీట్ పరిధిలోని కంపగూడెం,పెంట్లం, నామవరం సరిహద్దులో 94 హెక్టార్లలో గిరిజనులు పోడు సాగు చేస్తున్నారు. రెండేళ్ల క్రితం హక్కుపత్రాలు లేవంటూ పోలీసుల సహకారంతో ఫారెస్ట్ ఆఫీసర్లు ఆ భూమిలో మొక్కలు నాటారు. శనివారం కంపగూడెం, నామవరం గ్రామాలకు చెందిన పోడు రైతులు 23 హెక్టార్లలో మొక్కలను తొలగించారు. విషయం తెలుసుకున్న ఫారెస్ట్ ఆఫీసర్లు అక్కడికి చేరుకొని వారిని అడ్డుకున్నారు. తాము చావడానికైన సిద్ధమని, పోడు భూములను వదులుకునే ప్రసక్తే లేదని పోడుదారులు వాగ్వాదానికి దిగారు. ఎఫ్డీవో అప్పయ్య, జూలూరుపాడు సీఐ వసంతకుమార్ అక్కడకు చేరుకొని పోడుదారులతో మాట్లాడారు. ఐటీడీఏ పీవో దృష్టికి విషయాన్ని తీసుకెళ్లి న్యాయం చేస్తామని చెప్పడంతో ఆందోళన విరమించారు. రేంజర్ శ్రీనివాసరావు, ఎస్సై విజయ పాల్గొన్నారు.
