చంపడమే ఈజీ అనుకున్నా..పోలీసుల ముందు కేతన్ హంతకురాలి వాంగ్మూలం

• పుణె వ్యాపారవేత్త హత్యలో వెలుగులోకి సంచలన విషయాలు

పుణె: దేశవ్యాప్తంగా సంచలనం సృష్టించిన పుణె వ్యాపారవేత్త హత్యలో మరిన్ని సంచలన విషయాలు వెలుగులోకి వస్తున్నాయి. నగరానికి చెందిన రియల్టర్ కేతన్ అగర్వాల్​ను కాబోయే భార్య సియా గోయల్ హత్య చేసిన విషయం తెలిసిందే. తన బర్త్ డే సెలబ్రేషన్స్ కోసం కేతన్​ను లోహ్ గఢ్ కోటకు తీసుకెళ్లిన సియా.. కోట పైనుంచి కిందికి తోసింది. దీంతో తీవ్రగాయాలతో కేతన్ అక్కడికక్కడే చనిపోయాడు. ఈ హత్యను ప్రమాదంగా చిత్రీకరించేందుకు సియా చెప్పిన స్టోరీ మొత్తం బయటపడింది. దీంతో సియాతో పాటు కేతన్ హత్యకు కుట్ర చేసిన ఆమె ప్రియుడు చేతన్ చౌధరిని పోలీసులు అరెస్టు చేశారు. ఈ ఉందంతంలో కేతన్ ఫ్యామిలీతో పాటు, సియా కుటుంబం, ఇరువర్గాల బంధువులు సహా అందరిలో సహజంగా ఎదురైన ప్రశ్న ‘కేతన్​తో పెళ్లి ఇష్టంలేదని ఎంగేజ్ మెంట్ రద్దు చేసుకుని ఉండొచ్చు కదా’ అనే. విచారణలో భాగంగా పోలీసులు ఇదే ప్రశ్న అడగగా సియా షాకింగ్ జవాబిచ్చింది. ‘కేతన్​తో పెళ్లి తనకు ఇష్టంలేదని ఇంట్లో చెప్పడం, నవంబర్​లో తలపెట్టిన పెళ్లిని రద్దు చేసుకోవడం కన్నా అతడిని చంపెయ్యడమే ఈజీ అనుకున్నా’ అని చెప్పింది. ఈ సమాధానం విన్న పోలీసులు కూడా షాక్​కు గురయ్యారు. ఇంట్లో వాళ్ల సెంటిమెంట్ ను కాదని వారిని బాధ పెట్టడం తనకు ఇష్టంలేదని వివరించింది. కేతన్​ను హత్య చేసిన తర్వాత రెండు, మూడేళ్ల పాటు పెళ్లిని వాయిదా  వేయొచ్చని భావించినట్లు సియా తెలిపింది. చేతన్ చౌధరితో తన ప్రేమ నిజమేనని అంగీకరించిన సియా.. అతడిని పెళ్లి చేసుకోవడం కోసమే కేతన్​ను అడ్డుతప్పించుకోవాలని భావించానని వివరించింది. కాగా, సియా, చేతన్​ల ప్రేమ వ్యవహారం గురించి సియా ఇంట్లో ఏమాత్రం తెలియదని ఆమె సోదరుడు సాహిల్ గోయల్ చెప్పారు. ఆ ప్రేమ వ్యవహారం గురించి సియా ఇంట్లో చెప్పి ఉంటే తాము కేతన్​తో ఎంగేజ్ మెంట్ జరిపించేవారమే కాదన్నారు. చేతన్ ఫ్యామిలీ కూడా తమ వర్గానికి చెందినదే కావడంతో సియా, చేతన్​లకు పెళ్లి చేసేవారమని సాహిల్ స్పష్టం చేశారు. మరోవైపు, సియా తల్లి మీడియాతో మాట్లాడుతూ.. తన కూతురు ఆ హత్య చేసి 
ఉండదని, ఒకవేళ నిజంగానే కేతన్ హత్యకు కారణం సియా అని తేలితే ఆమెను ఉరితీయాలని చెప్పారు.