వరంగల్ జిల్లాలోని భట్టుతండా ప్రైమరీ స్కూల్లో పాముకాటుకు గురై బాలిక చనిపోయిన ఘటనపై బీఎస్పీ రాష్ట్ర అధ్యక్షులు ఆర్ఎస్ ప్రవీణ్ కుమార్ స్పందించారు. మన ఊరు, మన బడి పథకం పేరిట కోట్ల రూపాయలు మెఘా-ర్పణం చేసి, పాఠశాలలను తీర్చిదిద్దుతున్నామని గొప్పలు చెప్పుకున్న ఈ పాపం ఎవరిది అంటూ ట్విట్టర్ వేదికగా రాష్ర్ట ప్రభుత్వాన్ని ప్రశ్నించారు. ‘వందల కోట్ల రూపాయలు ఏ పందికొక్కులు బుక్కినయ్..? ప్రభుత్వ పాఠశాలల నిర్వహణను నిర్వీర్యం చేయడమేనా..? మీ లక్ష్యం’ అంటూ ట్విట్టర్ వేదికగా ఆర్ ఎస్ ప్రవీణ్ కుమార్ ఆగ్రహం వ్యక్తం చేశారు.
స్కూల్లో పాము కాటుతో చిన్నారి మృతి
భట్టు మోహన్, పార్వతిలకు ఇద్దరు కూతుళ్లు. పెద్ద కూతురు భట్టు మన్విత (6) వరంగల్జిల్లా పర్వతగిరి మండలం చింతనెక్కొండ శివారులోని భట్టుతండాలోని ప్రైమరీ స్కూల్లో చదువుతోంది. నిన్న ఉదయం స్కూల్కు వెళ్లింది. గురువారం (ఇవాళ) చెవులు కుట్టే ప్రోగ్రాం ఉందని ఫ్రెండ్స్కు చెప్పుకొని మురిసిపోయింది. బాత్రూం వస్తుందని టీచర్కు చెప్పడంతో వెళ్లమన్నాడు. క్లాస్ రూం నుంచి బయటికొచ్చిన మన్విత.. మెట్లు దిగుతుండగా తాచుపాము కాటేసింది. ఈ విషయాన్ని టీచర్కు చెప్పడంతో అతను పేరెంట్స్కు సమాచారం ఇచ్చాడు. వారు వచ్చి మన్వితను నర్సంపేట హాస్పిటల్కు తరలిస్తుండగా, మార్గమధ్యలో చనిపోయింది. చెవులు కుట్టే ప్రోగ్రాం ఉండటంతో ఇంటికొచ్చిన బంధువులు మన్విత చనిపోయిందని తెలుసుకుని కన్నీరు మున్నీరయ్యారు. పోలీసులు కేసు నమోదు చేసుకుని దర్యాప్తు చేస్తున్నారు.
