- నెలాఖరు నుంచి అమల్లోకి
- ఇప్పటికే 14 జిల్లాల్లో కొనసాగుతున్న బయోమెట్రిక్
హైదరాబాద్, వెలుగు: రాష్ట్రంలోని మరో 4 జిల్లాల్లో బయోమెట్రిక్ అటెండెన్స్ అమలు చేయాలని స్కూల్ ఎడ్యుకేషన్ నిర్ణయం తీసుకుంది. నిజామాబాద్, కరీంనగర్, సిరిసిల్ల, జనగామ జిల్లాల్లో ఆధార్ బేస్డ్ బయోమెట్రిక్ అటెండెన్స్ సిస్టమ్ అమలు చేయాలని స్కూల్ ఎడ్యుకేషన్ డైరెక్టర్ శ్రీదేవసేన ఆదేశాల మేరకు అధికారులు ఈ నెలాఖరు నుంచే అమలు చేసేలా ఏర్పాట్లు చేస్తున్నారు. ఇప్పటికే రాష్ట్రంలోని ఆదిలాబాద్, కుమ్రంభీం ఆసిఫాబాద్, కామారెడ్డి, సూర్యాపేట, వరంగల్, హనుమకొండ, జయశంకర్ భూపాలపల్లి, ములుగు, మహబూబాబాద్, నాగర్కర్నూల్, గద్వాల, వికారాబాద్, పెద్దపల్లి, జగిత్యాల తదితర జిల్లాల్లో ఈ విధానం అమలు జరుగుతోంది. కరోనాకు ముందు ఈ జిల్లాల్లో టీచర్లతో పాటు స్టూడెంట్లకు బయోమెట్రిక్ అటెండెన్స్ ఉండేది.
ప్రస్తుతం టీచర్లకే పరిమితం చేయడంతో మిగిలిన బయోమెట్రిక్ అటెండెన్స్ మిషన్లతో ఇంకో 4 జిల్లాల్లోని టీచర్లకు అమలు చేయనున్నారు. నిజామాబాద్కు 1144 డివైజ్లు, కరీంనగర్కు 623, రాజన్న సిరిసిల్లకు 472, జనగామకు 676 డివైజ్లను పంపించనున్నట్టు శ్రీదేవసేన ఉత్తర్వుల్లో పేర్కొన్నారు. మండల పాయింట్ల నుంచి వీటిని కలెక్ట్ చేసుకోవాలని హెడ్మాస్టర్లకు సూచించారు. ఆయా జిల్లాల్లోని గవర్నమెంట్, లోకల్ బాడీ స్కూళ్లలో వీటిని ఏర్పాటు చేయాలని తెలిపారు.
