కరీంనగర్ క్రైం: కరీంనగర్ జ్యోతినగర్లో ఆస్తి గొడవల్లో తండ్రిని ఓ కొడుకు హత్య చేశాడు. టూటౌన్‌ పోలీసులు తెలిపిన వివరాల ప్రకారం.. దయ్యాల శ్రీనివాస్(50) అనే వ్యక్తికి భార్య గంగ, కొడుకు హరీశ్ ఉన్నారు. భర్తతో మనస్పర్థలు రావడంతో గంగ 20 ఏండ్ల నుంచి అతడికి దూరంగా ఉంటోంది. వీరిద్దరి మధ్య ఆస్తి గొడవలు రావడంతో రెండేండ్ల కింద పెద్దల సమక్షంలో పంచాయితీ జరిగింది.
అప్పటి నుంచి కరీంనగర్‌లోనే శ్రీనివాస్ ఉంటున్న ఇంటికి దగ్గరలోని ఓ ఇంట్లో భార్య గంగ, కొడుకు హరీశ్ ఉంటున్నారు. ఈమధ్య తండ్రి, కొడుకుల మధ్య ఆస్తి వివాదం మళ్లీ ముదిరింది. భార్య , కొడుకు ఉంటున్న ఇంటికి శ్రీనివాస్ తాళం వేయడంతో సోమవారం రాత్రి గొడవ జరిగింది. ఈ గొడవలో ఇద్దరు ఒకరిపై ఒకరు దాడి చేసుకున్నారు. హరీశ్ తండ్రి శ్రీనివాస్‌ను నెట్టివేయడంతో తలకు తీవ్రగాయాలయ్యాయి. వెంటనే హరీశ్ టూటౌన్‌ పోలీసుస్టేషన్‌కు వెళ్లి గొడవ గురించి ఫిర్యాదు చేశాడు. పోలీసులు వచ్చి ఇంటి తలుపు తీసేసరికి శ్రీనివాస్ చనిపోయాడు. ఈ విషయంపై మృతుడి తండ్రి మల్లయ్య పోలీసులకు ఫిర్యాదు చేయగా కేసు నమోదు చేశారు.
