న్యూఢిల్లీ: ఆర్టీఐ సవరణలు చేయడం ద్వారా ఇన్ఫర్మేషన్ కమిషనర్ల అధికారాలను మోడీ సర్కార్ఆగం చేస్తోందని కాంగ్రెస్ ప్రెసిడెంట్ సోనియాగాంధీ ఫైరయ్యారు. కేంద్రం తీసుకొచ్చిన ఈ సవరణలతో ఏ ఇన్ఫర్మేషన్ కమిషనర్ కూడా స్వతంత్రంగా వ్యవహరించడానికి వీలులేకుండా పోయిందని ఆందోళన వ్యక్తం చేశారు. ఆర్టీఐ సవరణలను తాము పార్లమెంట్లో వ్యతిరేకించామని, బయట కూడా వీటి అమలును వ్యతిరేకిస్తామని ప్రకటించారు. ఆర్టీఐ తమకు అడ్డంకిగా మారిందని భావిస్తున్న మోడీ ప్రభుత్వం.. దానిపై తుది దాడిని ప్రారంభించిందని ఆరోపించారు. కీలకమైన ఈ పదవులకు ఉన్న ప్రాధాన్యాన్ని తగ్గిస్తే.. సెల్ఫ్ రెస్పెక్ట్ ఉన్న ఏ అధికారి కూడా మానిటర్ చేసే పరిస్థితుల్లో పని చేయడానికి ఇష్టపడరని పేర్కొన్నారు. ప్రజాస్వామ్య సంస్థలను నాశనం చేసే ఇలాంటి చర్యలను తాము ఖండిస్తున్నామని, దేశ ప్రయోజనాలకు వ్యతిరేకంగా మోడీ సర్కార్ తీసుకునే నిర్ణయాలకు వ్యతిరేకంగా పోరాటం కొనసాగిస్తామన్నారు.
