- ఇద్దరు నిందితులు అరెస్ట్, ఎండీఎంఏ స్వాధీనం
చందానగర్, వెలుగు: లగ్జరీ కార్లలో తిరుగుతూ డ్రగ్స్ అమ్ముతున్న ఇద్దరు వ్యక్తులను రంగారెడ్డి జిల్లా ఎస్టీఎఫ్ అధికారులు అదుపులోకి తీసుకున్నారు. కొండాపూర్కు చెందిన సాయి వికాస్, భరత్ చౌదరి కలిసి విజయవాడకు చెందిన మురారీ అనే వ్యక్తి నుంచి ప్రైవేట్ ట్రావెల్ బస్సుల ద్వారా ఎండీఎంఏ తెప్పిస్తున్నారు. వీటిని నగరంలోని అవసరమున్న వారికి గ్రాముకు రూ. 5 వేల చొప్పున విక్రయిస్తున్నారు.
శుక్రవారం తెల్లవారుజామున కొండాపూర్ మాధవ హిల్స్ వద్ద రైడ్ చేసిన పోలీసులు.. వీరి నుంచి 6.09 గ్రాముల ఎండీఎంఏను స్వాధీనం చేసుకున్నారు. గత ఆరు నెలలుగా ఈ దందా సాగిస్తున్నట్లు విచారణలో తేలింది. నిందితులను అరెస్ట్ చేసి, తదుపరి చర్యల కోసం కొండాపూర్ ఎక్సైజ్ పోలీసులకు అప్పగించారు. ప్రధాన సరఫరాదారు మురారీతో పాటు మరో ఇద్దరిపై కేసు నమోదు చేసి దర్యాప్తు చేస్తున్నారు.
