అభ్యర్థులకు పార్టీల లీగల్ హెల్ప్

• అభ్యర్థులకు పార్టీల లీగల్ హెల్ప్
• అఫిడవిట్​లలో తప్పులు దొర్లకుండా జాగ్రత్తలు
• జిల్లాకు మూడు టీమ్​లను ఏర్పాటు చేయనున్న కాంగ్రెస్​

హైదరాబాద్, వెలుగు: రాష్ట్రంలో అసెంబ్లీ ఎన్నికలు దగ్గర పడుతుండటంతో అఫిడవిట్ ఫైల్ చేయడంలో అభ్యర్థులకు సాయం చేసేందుకు ప్రధాన పార్టీలు సిద్ధం అవుతున్నాయి. ఆయా పార్టీల లీగల్ సెల్స్ టీమ్స్ ద్వారా అభ్యర్థుల అఫిడవిట్​లను దగ్గరుండి స్క్రూటినీ చేయనున్నాయి. అఫిడవిట్​ల విషయంలో సమస్యలు తలెత్తి కోర్టుల దాకా వెళ్లాల్సి వస్తున్నది. కొత్తగూడెం ఎమ్మెల్యే వనమా వెంకటేశ్వర రావు, మహబూబ్​నగర్ ఎమ్మెల్యే శ్రీనివాస్ గౌడ్, గద్వాల ఎమ్మెల్యే కృష్ణ మోహన్​​రెడ్డి విషయంలో అఫిడవిట్లు తప్పుగా వేశారంటూ కోర్టులో కేసులు దాఖలు అయ్యాయి. వనమా వెంకటేశ్వర రావు, కృష్ణమోహన్ రెడ్డి అభ్యర్థిత్వం రద్దు చేసే దాకా వెళ్లింది. ఈ నేపథ్యంలోనే ఇప్పుడు పార్టీలు ముందుగానే అలర్ట్ అయ్యాయి. అభ్యర్థులకు లీగల్ ఎక్స్​పర్ట్స్​తో అఫిడవిట్ ఫైలింగ్ చేయడంలో సాయం అందించనున్నాయి.

బీఆర్ఎస్ నుంచి మొదలు..

అన్ని పార్టీల కన్నా ముందుగానే బీఆర్ఎస్ పార్టీ అభ్యర్థులను ప్రకటించింది. బీ ఫామ్స్ కూడా పంచుతున్నది. ఈ క్రమంలోనే ఫాంలు, అఫిడవిట్​లు నింపేటప్పుడు జాగ్రత్తగా ఉండాలని అభ్యర్థులకు సీఎం కేసీఆర్ పదే పదే సూచించారు. దాంతో పాటు లీగల్ సాయం కోసం పార్టీ తరఫున ప్రతినిధిని నియమించారు. సోమ భరత్​కు లీగల్ అభిప్రాయాల బాధ్యతలను అప్పగించారు. ఆయన ఫోన్​ నెంబర్​నూ అభ్యర్థులందరికీ ఓపెన్​గా ప్రకటించారు. కోర్టు కేసులతో దెబ్బ పడింది బీఆర్ఎస్ ఎమ్మెల్యేలకే కావడం గమనార్హం. ఈ క్రమంలోనే ఈసారి అభ్యర్థులు జాగ్రత్తగా ఉండాల్సిందిగా సూచించారు. 

జిల్లాకు మూడు టీములు

కాంగ్రెస్​ కూడా అభ్యర్థుల విషయంలో ఈసారి జాగ్రత్తలు తీసుకుంటున్నది. పార్టీ నుంచి గెలిచాక జంప్ అవుతుండడంతో దానికి చెక్ పెట్టేలా కార్యాచరణను రూపొందిస్తున్నది. అఫిడవిట్లను జాగ్రత్తగా నింపడంతో పాటే.. అభ్యర్థుల నుంచి సెల్ఫ్ డిక్లరేషన్​ కూడా తీసుకోవాలని భావిస్తున్నది. అందుకు ప్రతి జిల్లాకు రెండు మూడు లీగల్ టీములను ఏర్పాటు చేయాలని భావిస్తున్నట్టు తెలుస్తున్నది. పార్టీకి లీగల్ సెల్ ఉన్నప్పటికీ..  ప్రస్తుతం అందులో సభ్యులెవరూ లేరని పార్టీ లీడర్లు చెప్తున్నారు.

ఈ క్రమంలోనే త్వరలోనే లీగల్ టీమ్​లను ఏర్పాటు చేసేందుకు సన్నాహాలు చేస్తున్నట్టు పార్టీ సీనియర్ నేత ఒకరు చెప్పారు. వనపర్తి జిల్లాలో ఒకే ఒక్క నియోజకవర్గం ఉన్నది. అలా తక్కువ నియోజకవర్గాలున్న జిల్లాల్లో అవసరాన్ని బట్టి లీగల్ టీమ్​లను నియమిస్తామని చెప్పారు. ఇటు బీజేపీ కూడా అభ్యర్థుల కోసం లీగల్ టీమ్​లను ఏర్పాటు చేస్తున్నట్టు తెలుస్తున్నది. ప్రతి అభ్యర్థికో లీగల్ ఎక్స్​పర్ట్​ను నియమించి అఫిడవిట్​లను ఫైల్ చేయించాలని భావిస్తున్నట్టు సమాచారం.