టిక్టాక్.. ఆఫీసులు, ఇళ్లు ఎక్కడపడితే అక్కడ యువత వీడియోలు చేస్తూ దాని మోజులో పడిపోయింది. జస్ట్ ఎంటర్టైన్మెంట్ కోసం తీసుకొచ్చిన యాప్ ఇది. అయితే, కొద్ది రోజుల క్రితం దానిని బ్యాన్ చేశారు. ప్రైవసీ, చైల్డ్ పోర్నోగ్రఫీకి అది ఊతమిస్తోందంటూ ఆరోపణలు వెల్లువెత్తాయి. ఈ నేపథ్యంలోనే దానిని కొన్ని చోట్ల నిషేధించారు. అన్ని విమర్శలు ఎదుర్కొన్న టిక్టాక్.. మొదటి సారి మంచి పనిని భుజానికెత్తుకుంది. భూమి అనే స్వచ్ఛంద సంస్థతో కలిసి కేంద్ర ప్రభుత్వం ప్రతిష్టాత్మకంగా తీసుకున్న స్వచ్ఛ భారత్ కార్యక్రమాన్ని ముందుకు తీసుకుపోనుంది. టిక్టాక్ యూజర్లకు క్లీన్ ఇండియా చాలెంజ్ను విసిరింది. #CleanIndia హాష్ట్యాగ్తో ఈ కార్యక్రమాన్ని ముందుకు తీసుకెళుతోంది. ఇందులో భాగంగా ‘భూమి’ దేశంలోని వివిధ నగరాల్లో ప్రచార కార్యక్రమాలనూ నిర్వహించనుంది. ఈ మిషన్లో పాల్గొనేలా టిక్టాక్ యూజర్లను ప్రోత్సహించనుంది. ఆగస్టు 2 నుంచి అక్టోబర్ 2 దాకా 30కిపైగా నగరాల్లో 100కు పైగా కార్యక్రమాలను నిర్వహిస్తామని భూమి పేర్కొంది.
