అన్ని పండుగల్లో సంక్రాంతి సమ్థింగ్ స్పెషల్. భోగి, సంక్రాంతి, కనుమ అంటూ మూడు రోజులు సంతోషాల్ని నింపుతుంది. కానీ, ఈసారి కొవిడ్ వల్ల ఎక్కువమంది ఒక దగ్గర చేరి పండుగ చేసుకునే పరిస్థితి లేదు. అందుకని, ఇంట్లోనే ఆత్మీయులతో గ్రాండ్గా సెలబ్రేట్ చేసుకోవాలి. మరి ఫెస్టివ్ లుక్ మాటేంటి అంటారా! అందుకోసమే ఈ టిప్స్ .
పండుగంటే సంబరాలు, సంతోషాలతో పాటు బోలెడు కబుర్లు కూడా. అంతా ఒకచోట చేరినప్పుడు కబుర్లతోనే కాలం గడిచిపోతుంది.అందుకే నలుగురూ కలిసి హాయిగా మాట్లాడుకోవడానికి చెక్క బెంచీలు, బల్లలు వేయాలి. వాటి మీద కుషన్స్ లేదా కలర్ఫుల్ దుపట్టాలు వేస్తే లుక్ బాగుంటుంది. అంత స్పేస్ లేదా... అయితే నేలమీద చాపలు పరిచి, పరుపు వేయాలి. నాలుగువైపులా పూల మొక్కలు పెట్టి, గోడలకి లాంతర్లు వేలాడదీస్తే వింటేజ్ లుక్ వస్తుంది.
బంతులు, చామంతులు ఇంటి గుమ్మానికి వేలాడదీస్తే పండుగ కళ నడిచొస్తుంది. అయితే ఎప్పటిలా రొటీన్గా కాకుండా .. డిఫరెంట్ షేప్స్లో వీటిని గుమ్మానికి అలంకరించాలి . అంటే మామిడి ఆకుల అంచున బంతి పువ్వులు గుచ్చాలి. లేదా నాలుగైదు మామిడాకుల్ని ఒకదానిపై ఒకటి పువ్వులా పేర్చి వాటిపైన బంతిపువ్వులు గుచ్చి గుమ్మానికి వేలాడదీయాలి. గుమ్మానికి రెండువైపులా, ఇంట్లో అక్కడక్కడా నీటి తొట్టెలు పెట్టి వాటిల్లో బంతిపూలు పరిస్తే ఫెస్టివల్ మరింత కలర్ఫుల్గా ఉంటుంది. బంతిపూలతో ‘హ్యాపీ సంక్రాంతి’ అని గుమ్మం ముందు రాయొచ్చు కూడా. అలాగే డైనింగ్ టేబుల్ మధ్యలో ఫ్లవర్ వేజ్లు పెడితే లుక్ బాగుంటుంది,
సంక్రాంతికి దీపాల వెలుగులు లేకపోతే ఎలా? పండుగకి ఒకట్రెండురోజులు ముందుగానే ఎలక్ట్రికల్ లైట్స్ పెట్టించుకోవాలి. ఇంటి ఎంట్రన్స్లో లైట్స్ పెడితే పండుగకి కొత్త కళ వస్తుంది. స్ట్రింగ్ లైట్స్ని లివింగ్, బెడ్ రూమ్లలో వేలాడదీస్తే ఎలిగెంట్లుక్ వస్తుంది. పేపర్ లాంతర్లు, ఎగ్ కార్డన్ లాంప్స్, సీ షెల్ లైట్స్ని కూడా ఫెస్టివల్ డెకరేషన్లో యాడ్ చేయొచ్చు. అంత ఖర్చు వద్దనుకుంటే గ్లాస్ జార్స్లో లైట్స్ని అమర్చొచ్చు. వాటిల్లో క్యాండిల్స్ పెట్టినా మంచి లుక్ వస్తుంది. అలాగే గ్లాస్ జార్స్లో ఎండుటాకులు కూడా వేసి టీపాయ్ మీద పెట్టొచ్చు. గ్లాస్ జార్స్పై నక్షత్రం షేప్లో ఉండే రేడియం స్టిక్కర్స్ కూడా అతికించొచ్చు. అలాగే గార్డెన్లో లైట్స్తో పాటు షేడెడ్ కానోపీస్ని పెట్టాలి.
పతంగులతో ఇంటీరియర్లో పనిలేదనుకుంటే పొరపాటే. ఫెస్టివ్ లుక్కి వీటిని మించిన డెకరేటివ్ పీస్ మరొకటి లేదు. రంగురంగుల గాలిపటాల్ని ఇంటి గుమ్మం చుట్టూ అతికించొచ్చు. లివింగ్ రూమ్ గోడలపై డిఫరెంట్ షేప్స్ గాలిపటాల్ని వరుసగా పేర్చినా లుక్ బాగుంటుంది. అయితే డెకరేషన్కి డిఫరెంట్ కలర్స్ ఉన్న పతంగుల్ని ఎంచుకోవాలి. కలర్ కాంబినేషన్ని సెట్ చేసుకొని గోడలకి అతికించాలి. అరటి ఆకుల్ని గోడలపై అతికించి.. వాటి మీద గాలిపటాల్ని అమర్చినా బాగుంటుంది. బయట కొనడం ఇష్టం లేకపోతే ఇంట్లోనే పేపర్ని గాలిపటంలా కత్తిరించి అతికించొచ్చు. అలాగే భోగి మంటలు వేసేచోట కూడా కైట్స్తో ఆర్చ్ ఏర్పాటు చేసుకోవచ్చు. ఇంటి బాల్కనీకి గాలి పటాల్ని వేలాడదీసినా లుక్ బాగుంటుంది.
సంక్రాంతి అంటేనే రంగుల ముగ్గులు. ఇంటి వాకిట్లో, గుమ్మం ముందు వేసే ముగ్గుల్ని హాల్లోకి కూడా తీసుకురావచ్చు. అయితే పెద్దపెద్ద ముగ్గులకి బదులు సింపుల్గా, రంగులద్దడానికి అనువుగా ఉండే ముగ్గులు చూడ్డానికి బాగుంటాయి. వాటి మీద భోగి కుండలు పెడితే స్పెషల్ లుక్ వస్తుంది. అయితే భోగి కుండల్ని కాస్త కలర్ఫుల్గా డెకరేట్ చేయాలి. వాటి చుట్టూరా పెయింటింగ్స్ వేయాలి. లేదంటే వాటిపై సున్నంతో ముగ్గులు వేసినా, వాటి చుట్టూరా బంతిపూల మాల చుట్టినా ఫెస్టివ్ లుక్ వస్తుంది. వాటిల్లో చెరకు గడలు కూడా పెట్టుకోవచ్చు.
