వాషింగ్టన్: ‘డాక్టర్ ఫౌసీ, హెల్త్ ఎక్స్ పర్ట్స్ ఇడియట్స్, వాళ్ల మాటలు విని ఉంటే 5 లక్షల మంది అమెరికన్లు చనిపోయేవాళ్లు’ అని అమెరికా ప్రెసిడెంట్ డొనాల్డ్ ట్రంప్ ఫైర్ అయ్యారు. సోమవారం లాస్ వెగాస్ లో ఎన్నికల ప్రచారంలో ఆయన ఈ కామెంట్స్ చేశారు. ‘కరోనా రిస్ట్రిక్షన్స్ వల్ల అమెరికన్లు విసిగిపోయారు. ఏమైనా జరగనీ మమ్మల్ని ఒంటరిగా వదిలేయండి అని అంటున్నారు. డాక్టర్ ఫౌసీ, హెల్త్ ఎక్స్ పర్ట్స్ ఇడియట్స్. వాళ్ల మాటలు విని అమెరికన్లు అలసిపోయారు. డాక్టర్ ఫౌసీ ఓ డిజాస్టర్. ఇప్పటికైనా మంచి డెసిషన్స్ తీసుకోవాలి’ అని అన్నారు. నేషనల్ ఇనిస్టిట్యూట్ ఆఫ్ అలర్జీ అండ్ ఇన్ఫెక్షస్ డిసీజెస్ డైరెక్టర్ ఆంథోనీ ఫౌసీ.. వైట్హౌస్ కరోనా వైరస్ టాస్క్ ఫోర్స్కు చీఫ్ గా ఉన్నారు. కరోనా విషయంలో మొదట్నుంచీ ఫౌసీ, ట్రంప్‌‌‌‌తో విభేదిస్తూనే ఉన్నారు. ట్రంప్ నిర్లక్ష్యం వల్లే అమెరికాలో 2 లక్షల మందికిపైగా మరణించారని ఆయన ఆరోపించారు. ఇది రానున్న అమెరికా అధ్యక్ష ఎన్నికల్లో ప్రభావం చూపనుంది. మరోవైపు ట్రంప్ నిర్లక్ష్యంతో అమెరికన్ల ప్రాణాలు రిస్క్ లో పడ్డాయని ప్రత్యర్థి జో బిడెన్ ఆరోపించారు.
జో బిడెన్ తో డిబేట్ లో పాల్గొంటా: ట్రంప్
అమెరికా అధ్యక్ష ఎన్నికల్లో జో బిడెన్ తో డిబేట్లో పాల్గొంటానని ట్రంప్ ప్రకటించారు. ఈ నెల 22న టెన్నెస్సీలోని బెల్మంట్ యూనివర్సిటీలో ప్రెసిడెన్షియల్ డిబేట్ కు రెడీగా ఉన్నట్టు చెప్పారు.
