కరీంనగర్ జిల్లాలో ఘోర రోడ్డు ప్రమాదం జరిగింది. ఆదివారం ( నవంబర్ 30 ) జరిగిన ఈ ప్రమాదంలో ఇద్దరు మృతి చెందగా మరొకరి పరిస్థితి విషమంగా ఉన్నట్లు తెలుస్తోంది. ఇందుకు సంబంధించి వివరాలిలా ఉన్నాయి.. కరీంనగర్ రురల్ మండలం నుగునూరు శివారులోని చమనపల్లి రోడ్ లో ఉన్న వైన్ షాపు దగ్గర రోడ్డు ప్రమాదం జరిగింది. రెండు బైకులు ఢీకొని పడిపోయినవారిని వేగంగా వచ్చి ఢీకొట్టింది ట్రక్కు. దీంతో ఇద్దరు అక్కడికక్కడే మృతి చెందగా.. ,మరో మహిళకు తీవ్ర గాయాలయ్యాయి.
ఈ ఘటనలో గాయపడ్డ మహిళను ఆసుపత్రికి తరలించి చికిత్స అందిస్తున్నారు. మహిళ పరిస్థితి విషమంగా ఉన్నట్లు తెలుస్తోంది. ఈ ఘటనపై కేసు నమోదు చేసి దర్యాప్తు చేస్తున్నారు పోలీసులు. ఇదిలా ఉండగా.. తమిళనాడులో ఘోర రోడ్డు ప్రమాదం జరిగింది. తమిళనాడు ఆర్టీసీకి చెందిన రెండు బస్సులు ఢీకొన్న ఘటనలో 11 మంది చనిపోయారు. 40 మందికి గాయాలయ్యాయి. తమిళనాడులోని శివగంగ జిల్లాలో ఆదివారం ఈ ఘోరం జరిగింది. తమిళనాడు రాజధాని చెన్నైకి 460 కిలోమీటర్ల దూరంలో శివగంగ ఉంది. శివగంగ జిల్లా కుంద్రకుడి సమీపంలోని కుమ్మన్ గుడి దగ్గర ఈ రోడ్డు ప్రమాదం జరిగింది.
రెండు బస్సుల్లో ఒక బస్సు తిరుప్పూరు నుంచి కారైకుడి వెళుతుండగా.. మరో బస్సు కారైకుడి నుంచి దిండిగల్ వైపు వెళుతోంది. సమతువపురం దగ్గర ఎదురెదురుగా వచ్చిన ఈ రెండు బస్సులు ఢీకొన్నాయి. రెప్పపాటు సమయంలో ఈ ఘటన జరిగింది. 9 మంది స్పాట్లోనే చనిపోయారు. మరో ఇద్దరు ఆసుపత్రిలో చికిత్స పొందుతూ చనిపోయారు.
