హైదరాబాద్: విధుల్లో ఉన్న ట్రాఫిక్ కానిస్టేబుల్పై యువకుడు దాడి చేసిన ఘటన ఆలస్యంగా వెలుగులోకి వచ్చింది. నవంబర్ 26వ తేదీన సరూర్ నగర్ పోలీస్ స్టేషన్ పరిధిలోని కొత్తపేట చౌరస్తా దగ్గర విధుల్లో ఉన్న ట్రాఫిక్ కానిస్టేబుల్ అప్పారావుపై ద్విచక్రవాహనదారుడు భరత్ రాయితో దాడి చేసిన ఘటన ఆలస్యంగా వెలుగులోకి వచ్చింది. హెల్మెట్ లేకపోవడంతో చలాన్ వేయడం పట్ల అసహనం చెందిన భరత్ ద్విచక్ర వాహనం అక్కడే వదిలేసి వెళ్లి, 15 నిమిషాల తర్వాత తిరిగి వచ్చి కానిస్టేబుల్పై రాయితో దాడి చేసి, పోలీసుల ట్యాబ్‌ను ధ్వంసం చేసినట్లు పోలీసులు తెలిపారు. స్థానికులు అతడిని పట్టుకుని పోలీసులకి అప్పగించారు. కేసు నమోదు చేసి నిందితుడిని రిమాండ్‌కు తరలించినట్లు సరూర్ నగర్ పోలీసులు వెల్లడించారు.
రాయితో కొట్టడంతో సదరు ట్రాఫిక్ కానిస్టేబుల్కు తీవ్ర గాయమైంది. గాయం నుంచి రక్తం ధారలా కారి రోడ్డుపై పడింది. రోడ్డుపై రక్తం పడిన దృశ్యాలు స్పష్టంగా కనిపించాయి. దెబ్బ తగిలిన వెంటనే కానిస్టేబుల్ కుప్పకూలి రోడ్డుపై పడిపోయాడు. గాయపడిన కానిస్టేబుల్ అప్పారావును స్థానికులు సమీపంలోని ఆసుపత్రికి తరలించారు. తన ఫోన్ను పగలగొట్టాడని, బైక్ కీస్ గుంజుకున్నాడని దాడి చేసిన యువకుడు ఆరోపించాడు. ఆ యువకుడు మద్యం మత్తులో కానిస్టేబుల్పై ఈ దాడి చేశాడేమోననే అనుమానాలున్నాయి.
పోలీస్ అధికారులు, ఉపాధ్యాయులు, ఆర్టీసీ సిబ్బంది తదితర ప్రభుత్వ ఉద్యోగుల విధులకు ఆటంకం కలిగిస్తే కఠిన చర్యలు తప్పవని హైదరాబాద్ సిటీ పోలీస్ కమిషనర్ సజ్జనార్ ఇప్పటికే హెచ్చరించిన సంగతి తెలిసిందే. విధి నిర్వహణలో ఉన్న ఉద్యోగులపై దాడులు చేస్తే నిందితులపై క్రిమినల్ కేసులు నమోదు చేస్తామన్నారు. అవసరమైతే హిస్టరీ షీట్లు తెరుస్తామన్నారు. క్షణికావేశంలో చేసే చిన్న పొరపాటు జీవితాంతం బాధ కలిగించేలా మారుతుందని ప్రజలను అప్రమత్తం చేశారు.
