ఎలక్షన్ విధులు నిర్వహించడంలో నిర్లక్ష్యం వహించిన గ్రామపంచాయతీ కార్యదర్శిని సస్పెండ్ చేశారు వికారాబాద్ జిల్లా కలెక్టర్, జిల్లా ఎన్నికల అధికారి ప్రతీక్ జైన్. జిల్లాలోని కోట్పపల్లి మండలంలోని కరీంపూర్ గ్రామ పంచాయతీ కార్యదర్శి (గ్రేడ్-II) ఎండి.ఖాజా హమీదుద్దీన్ ను నవంబర్ 30వ తేదీన సస్పెండ్ చేశారు. ఎలక్షన్ విధులు నిర్వహించడంలో పూర్తిగా నిర్లక్ష్యం వహించినందుకు సస్పెండ్ చేసినట్లు ఈ సందర్భంగా ప్రకటన విడుదల చేయడం జరిగింది. జిల్లాలోని పంచాయతీ కార్యదర్శలు ఎలక్షన్ విధులను సక్రమంగా నిర్వహించాలని ఆయన సూచించారు.
వికారాబాద్ జిల్లాలో గ్రామ పంచాయతీ ఎన్నికల నియమావళి అమల్లో ఉండడంతో ప్రతి సోమవారం నిర్వహించే ప్రజావాణిని తాత్కాలికంగా రద్దు చేసినట్లు అధికారులు తెలిపారు. సర్పంచ్ ఎన్నికలు ముగిసిన తర్వాత ప్రజావాణి కార్యక్రమం యథావిధిగా కొనసాగుతుందని పేర్కొన్నారు.
మరోవైపు పంచాయతీ ఎన్నికలు ఉన్న క్రమంలో ఇప్పటికే ఎన్నికల కమిషన్ ఆదేశాల మేరకు వికారాబాద్ జిల్లాలో గ్రామ పంచాయతీ ఎన్నికల ప్రవర్తన నియమావళి అమలు లో భాగంగా మీడియా సెంటర్ ను ఏర్పాటు చేసినట్లు చెప్పారు. ఎన్నికల్లో పోటీ చేసే అభ్యర్థుల పత్రికా ప్రకటనలు, సోషల్ మీడియా ప్రచారంపై మీడియా సెంటర్ ద్వారా నిఘా పెట్టడం జరుగుతుందన్నారు.
