టాలీవుడ్ సూపర్ స్టార్ మహేష్ బాబు ఇంట్లో పెళ్లి సందడి మొదలైంది. ఆయన మేనల్లుడు, మాజీ ఎంపీ గల్లా జయదేవ్ చిన్న కుమారుడు సిద్ధార్థ్ గల్లా త్వరలో పెళ్లి పీటలెక్కబోతున్నారు. దక్షిణ కొరియాకు చెందిన తన ప్రేయసి హైయిన్ కిమ్‌తో వివాహ బంధంలోకి అడుగుపెట్టేందుకు సిద్ధమయ్యారు. ఇప్పటికే ఈ జంటకు సంబంధించిన ప్రీ వెడ్డింగ్ వేడుకలు ప్రారంభం కావడంతో ఘట్టమనేని, గల్లా కుటుంబాల్లో సందడి నెలకొంది. తాజాగా నమ్రత శిరోద్కర్ షేర్ చేసిన ఫొటోలు సోషల్ మీడియాలో వైరల్‌గా మారాయి.
ప్రీ వెడ్డింగ్ ఫొటోలు వైరల్..
సూపర్ స్టార్ మహేష్ బాబు సోదరి పద్మావతి, గల్లా జయదేవ్ తనయుడు సిద్ధార్థ్ గల్లా వివాహ వేడుకలు ఘనంగా ప్రారంభమయ్యాయి. దక్షిణ కొరియాకు చెందిన హైయిన్ కిమ్ (జిన్నీ)తో ఆయన ఏడడుగులు వేయనున్నారు. ఇప్పటికే జులై 13న వీరి నిశ్చితార్థం జరగ్గా, తాజాగా ప్రీ వెడ్డింగ్ వేడుకల ఫొటోలను నమ్రత శిరోద్కర్ సోషల్ మీడియాలో షేర్ చేశారు. సంప్రదాయ దుస్తుల్లో కొత్త జంటతో పాటు కుటుంబ సభ్యులు సందడి చేసిన ఈ ఫొటోలు ప్రస్తుతం నెట్టింట వైరల్‌గా మారాయి. దీంతో సిద్ధార్థ్ పెళ్లి వేడుకలపై అభిమానుల్లో ఆసక్తి మరింత పెరిగింది.
నమ్రత స్పెషల్ పోస్ట్.. కొత్త జంటకు శుభాకాంక్షలు..
ఈ వేడుకల ఫొటోలను షేర్ చేసిన నమ్రత శిరోద్కర్ కొత్త జంటకు ప్రత్యేకంగా శుభాకాంక్షలు తెలిపారు. ‘‘పెళ్లి వేడుకలు.. కుటుంబ సభ్యులతో కలిసి గడిపే ప్రతి క్షణం ఎంతో ఆనందంగా ఉంటుంది! @everywhere_aigoo & @sidgalla మీ ఇద్దరికీ హృదయపూర్వక అభినందనలు. మీ వైవాహిక జీవితం ప్రేమానురాగాలతో, సంతోషాలతో నిండిపోవాలని.. జీవితాంతం ఇలాగే కలిసిమెలిసి ఆనందంగా సాగిపోవాలని మనస్ఫూర్తిగా ఆశీర్వదిస్తున్నాను!’’ అంటూ పోస్ట్ చేశారు. ఈ పోస్ట్ వైరల్ అవ్వడంతో మహేష్ ఫ్యాన్స్, సినీ స్టార్స్ పెద్ద ఎత్తున శుభాకాంక్షలు తెలుపుతున్నారు.
ఈ వేడుకల్లో నమ్రతతో పాటు సిద్ధార్థ్ తల్లి పద్మావతి, మంజుల ఘట్టమనేని తదితర కుటుంబ సభ్యులు పాల్గొని సందడి చేశారు. సిద్ధార్థ్ లేత రంగు కుర్తా సెట్‌లో కనిపించగా, హైయిన్ కిమ్ ఆరెంజ్ రంగు సంప్రదాయ లెహంగా తరహా దుస్తుల్లో ఆకట్టుకున్నారు. సంప్రదాయ ఆభరణాలు, నుదుట తిలకంతో ఆమె భారతీయ వస్త్రధారణలో ప్రత్యేక ఆకర్షణగా నిలిచారు. అయితే ఈ ప్రీ వెడ్డింగ్ వేడుకల్లో మహేశ్ బాబు కనిపించకపోవడం కూడా అభిమానుల దృష్టిని ఆకర్షించింది. తన తాజా చిత్రం 'వారణాసి' షూటింగ్, ఇతర పనులతో బిజీగా ఉండటం వల్లే ఆయన ఈ వేడుకకు హాజరుకాలేకపోయినట్లు కొన్ని ఆంగ్ల మీడియా కథనాలు పేర్కొన్నాయి.
ఎవరీ హైయిన్ కిమ్.. ఎలా మొదలైంది ప్రేమకథ?
సిద్ధార్థ్ గల్లా కాబోయే భార్య హైయిన్ కిమ్ దక్షిణ కొరియాకు చెందిన యువతి. జిన్నీ పేరుతోనూ సోషల్ మీడియాలో పరిచయమైన ఆమెకు, సిద్ధార్థ్‌తో కాలేజీ రోజుల నుంచే పరిచయం ఉన్నట్లు కథనాలు చెబుతున్నాయి. కొంతకాలంగా ప్రేమలో ఉన్న ఈ జంట తమ లవ్ స్టోరీ ఎక్కడ మొదలైందనే విషయాన్ని మాత్రం అధికారికంగా వెల్లడించలేదు. ట్రావెలింగ్‌పై ఆసక్తి ఉన్న హైయిన్ సాధారణంగా మీడియాకు దూరంగా ఉంటారు. మరోవైపు సిద్ధార్థ్ కూడా సినీ రంగానికి దూరంగా కుటుంబ వ్యాపార వ్యవహారాలు చూసుకుంటున్నారు. ఈ జంట వివాహ వేడుక ఇటలీలో జరగనున్నట్లు ప్రచారం జరుగుతోంది. దీంతో సిద్ధార్థ్ గల్లా డెస్టినేషన్ వెడ్డింగ్‌పై అభిమానుల్లో ఆసక్తి పెరిగింది. అయితే పెళ్లి తేదీ, వేదిక వివరాలను ఇరు కుటుంబాలు ఇంకా అధికారికంగా వెల్లడించలేదు.
సినిమాల్లో అశోక్ గల్లా.. వ్యాపార రంగంలో సిద్ధార్థ్
గల్లా జయదేవ్, పద్మావతి దంపతులకు ఇద్దరు కుమారులు. పెద్ద కుమారుడు అశోక్ గల్లా తెలుగు సినీ పరిశ్రమలో హీరోగా గుర్తింపు తెచ్చుకునే ప్రయత్నం చేస్తున్నారు. 2022లో 'హీరో' సినిమాతో నటుడిగా పరిచయమైన ఆయన, ఆ తర్వాత 'దేవకీ నందన వాసుదేవ' వంటి చిత్రాల్లో నటించారు. ప్రస్తుతం సినిమాల్లో కొనసాగుతున్నారు. ఇక చిన్న కుమారుడు సిద్ధార్థ్ మాత్రం నటన వైపు వెళ్లకుండా వ్యాపార రంగాన్ని ఎంచుకున్నారు. కుటుంబ వ్యాపార వ్యవహారాల్లో కీలకంగా వ్యవహరిస్తున్నారు. ఇప్పుడు ఆయన వివాహ వేడుకలతో ఘట్టమనేని, గల్లా కుటుంబాల్లో పండగ వాతావరణం నెలకొంది. నమ్రత షేర్ చేసిన ఫొటోలు చూసిన మహేష్ అభిమానులు, సినీ ప్రముఖులు ఈ జంటకు ముందుగానే శుభాకాంక్షలు తెలియజేస్తున్నారు.
