భోపాల్: మన దేశంలో ఒక కార్పొరేటర్ తన కొడుకుకో, కూతురికో పెళ్లి చేస్తేనే కోట్లు ఖర్చు పెట్టి.. ఆకాశమంత పందిరి.. భూదేవంత పీట వేసి.. అంగరంగ వైభవంగా పెండ్లి చేస్తుంటారు. డీజే, సంగీత్, బారాత్ అని పెళ్లికి ముందు.. పెళ్లి తర్వాత కోట్లు ఖర్చు చేసి అట్టహాసంగా పెళ్లిళ్లు చేస్తుంటారు. ఇక.. ఎమ్మెల్యేలు, మంత్రుల కొడుకులు, కూతుర్ల పెళ్లిళ్ల గురించైతే ప్రత్యేకంగా చెప్పనక్కర్లేదు. కూతురి పెళ్లికి 5 వందల కోట్లు ఖర్చు చేసిన రాజకీయ నాయకులు ఉన్న దేశం మనది. అలాంటి ఇదే దేశంలో ఒక ముఖ్యమంత్రి తన కొడుకు పెళ్లిని 2025లో నిరాడంబరంగా చేశారంటే నమ్మగలమా..! ఏంటి.. సీఎం కొడుకు పెళ్లి అంత సింపుల్గా చేయడమా..? అని విస్తుపోవడం ఖాయం.
మధ్యప్రదేశ్ ముఖ్యమంత్రి డాక్టర్ మోహన్ యాదవ్ తన కొడుకు పెళ్లిని ఇలానే జరిపించారు. 21 జంటల సామూహిక వివాహాలతో పాటే తన కొడుకు డాక్టర్. అభిమన్యు యాదవ్ పెళ్లిని కూడా మధ్యప్రదేశ్ సీఎం జరిపించేశారు. మధ్యప్రదేశ్ ముఖ్యమంత్రి డాక్టర్ మోహన్ యాదవ్ చిన్న కుమారుడు డాక్టర్ అభిమన్యు యాదవ్ ఆదివారం ఉజ్జయినిలోని క్షిప్రా నది ఒడ్డున జరిగిన సామూహిక వివాహ వేడుకలో డాక్టర్ ఇషితా పటేల్‌ను పెళ్లి చేసుకున్నారు.
బాబా రాందేవ్, బాగేశ్వర్ ధామ్ ప్రధాన పూజారి పండిట్ ధీరేంద్ర శాస్త్రి కూడా ఉజ్జయినిలో జరిగిన ఈ సామూహిక వివాహ వేడుకకు హాజరై వివాహం చేసుకున్న 22 జంటలను ఆశీర్వదించారు. కొడుకు వివాహాన్ని నిరాడంబరంగా చేయాలని ఆలోచన చేసిన మధ్యప్రదేశ్ ముఖ్యమంత్రిని అతిథులు ప్రశంసించారు. ముఖ్యమంత్రి డాక్టర్ మోహన్ యాదవ్ కుమారుడి వివాహ వేడుకకు కేంద్ర మంత్రి జ్యోతిరాదిత్య సింధియా, గవర్నర్ మంగుభాయ్ పటేల్, మంత్రులు కైలాష్ విజయ్‌వర్గియ, విశ్వాస్ సారంగ్, కరణ్ సింగ్‌తో పాటు ప్రభుత్వంలోని పలువురు మంత్రులు, ఎమ్మెల్యేలు, భారతీయ జనతా పార్టీ సీనియర్ నాయకులు హాజరయ్యారు.
భారతదేశంలో పెండ్లికి ఎక్కువ ఖర్చు చేయడానికి మొదటి కారణం.. చుట్టూ ఉన్న సమాజం. సమాజంలో పరువు, ప్రతిష్టలను నిలబెట్టుకునేందుకు తల తాకట్టు పెట్టయినా సరే ఘనంగా పెండ్లి చేయాలనుకుంటున్నారు పేరెంట్స్. అలా చేయలేదంటే రేపటి రోజున సమాజంలో తమని చిన్న చూపు చూస్తారేమో.. అనే భావన పేరెంట్స్ మనసులో ఉంటోంది. అదే ఆడపిల్ల తల్లిదండ్రులయితే.. పెండ్లి గ్రాండ్గా చేయకపోతే వియ్యాల వారి ముందు మాట వస్తుందనే ఆలోచనతో విపరీతంగా ఖర్చు పెట్టేస్తున్నారు.
ఇలా సొసైటీ గురించి ఆలోచించి.. ఒత్తిడికి లోనవుతున్నారు. అదే ఖర్చు పెంచడానికి దారితీస్తోంది. అలా పెండ్లి ఖర్చుకి సామాజిక ఒత్తిడి మొదటి కారణంగా ఉంటోంది. అలాంటిది.. కోట్లు ఖర్చు పెట్టే స్థోమత ఉన్నా కొడుకు పెళ్లి ఇంత నిరాడంబరంగా జరిపించి స్పూర్తిదాయకంగా నిలిచిన మధ్యప్రదేశ్ ముఖ్యమంత్రి మోహన్ యాదవ్పై ప్రశంసల జల్లు కురిసింది.
