సౌతాఫ్రికాతో జరిగిన తొలి వన్డేలో టీమిండియా కష్టపడి గెలిచింది. ఆదివారం (నవంబర్ 30) రాంచీ వేదికగా జరిగిన ఈ మ్యాచ్ లో 17 పరుగుల తేడాతో గెలిచి ఊపిరి పీల్చుకుంది. మొదట బ్యాటింగ్ లో విరాట్ కోహ్లీ సెంచరీ (120 బంతుల్లో 135: 11 ఫోర్లు, 7 సిక్సర్లు)తో విధ్వంసం సృష్టిస్తే.. ఆ తర్వాత బౌలింగ్ లో కుల్దీప్, హర్షిత్ రానా అదరగొట్టారు. మొదట బ్యాటింగ్ చేసిన ఇండియా నిర్ణీత 50 ఓవర్లలో 8 వికెట్ల నష్టానికి 349 పరుగులు చేసింది. లక్ష్య ఛేదనలో సౌతాఫ్రికా 49.2 ఓవర్లలో 332 పరుగులకు ఆలౌట్ అయింది. మార్కో జాన్సెన్ (70), మాథ్యూ బ్రీట్జ్కే (72), కార్బిన్ బాష్ (67) సౌతాఫ్రికా విజయం కోసం తీవ్రంగా ప్రయత్నించినా ఫలితం లేకుండా పోయింది. ఈ విజయంతో మూడు వన్డే మ్యాచ్ ల సిరీస్ లో ఇండియా 1-0 ఆధిక్యంలో నిలిచింది.
350 పరుగుల టార్గెట్ తో బరిలోకి దిగిన సౌతాఫ్రికాకు ఆరంభంలోనే ఎదురు దెబ్బలు తగిలాయి. హర్షిత్ రానా ఒకే ఓవర్లో ర్యాన్ రికెల్టన్, క్వింటన్ డి కాక్ లను డకౌట్ ఔట్ చేసి డబుల్ స్ట్రోక్ ఇచ్చాడు. కాసేపటికే మార్కరం (7)ను అర్షదీప్ సింగ్ పెవిలియన్ కు పంపాడు. దీంతో సౌతాఫ్రికా 11 పరుగుల వద్ద మూడు కీలక వికెట్లు కోల్పోయి కష్టాల్లో పడింది. ఈ దశలో సఫారీ జట్టును మాథ్యూ బ్రీట్జ్కే, టోనీ డి జోర్జీ (39) ఆదుకున్నారు. దూకుడుగా ఆడుతూ ఇన్నింగ్స్ ను ముందుకు తీసుకెళ్లారు. నాలుగో వికెట్ కు 66 పరుగులు జోడించిన తర్వాత టోనీ డి జోర్జీ వికెట్ కు కుల్దీప్ పడగొట్టి వీరి భాగస్వామ్యానికి బ్రేక్ వేశాడు.
77 పరుగులకే నాలుగు వికెట్లు కోల్పోయినా మాథ్యూ బ్రీట్జ్కే, బ్రేవీస్ తో మరో కీలక భాగస్వామ్యాన్ని నిర్మించాడు. ఆరో వికెట్ కు 53 పరుగులు జోడించిన తర్వాత వేగంగా ఆడిన బ్రేవీస్ 28 బంతుల్లోనే 37 పరుగులు చేసి పెవిలియన్ కు చేరాడు. బ్రేవీస్ ఔట్ కావడంతో రిలాక్స్ అయిన టీమిండియా ఆ తర్వాత జాన్సెన్ రూపంలో మరో విధ్వంసం వస్తుందని ఊహించి ఉండరు. జాన్సెన్, బ్రీట్జ్కే కలిసి టీమిండియా బౌలర్లను వణికించారు. ముఖ్యంగా జాన్సెన్ బౌండరీల వర్షం కురిపించాడు. ప్రమాదకరంగా మారుతున్న ఈ జోడీని కుల్దీప్ ఒకే ఓవర్లో పెవిలియన్ కు పంపి బిగ్ రిలీఫ్ ఇచ్చాడు.
వీరిద్దరి జోడీ 8 ఓవర్లల్లోనే 97 పరుగులు జోడించి భారత బౌలర్లలను కంగారు పెట్టారు. చివర్లో కార్బిన్ బాష్ (67) అసాధారణంగా పోరాడి భారత జట్టుకు చెమటలు పట్టించాడు. చివరి ఓవర్లో 18 పరుగులు కావాల్సిన దశలో ప్రసిద్ కృష్ణ బౌలింగ్ లో బాష్ ఔట్ కావడంతో ఇండియా విజయం సాధించింది. భారత బౌలర్లలో కుల్దీప్ యాదవ్ నాలుగు.. హర్షిత్ రానా 3.. అర్షదీప్ సింగ్ రెండు.. ప్రసిద్ ఒక వికెట్ పడగొట్టాడు. ఒక వికెట్ పడగొట్టాడు.
టీమిండియా బిగ్ స్కోర్:
అంతకముందు మొదట బ్యాటింగ్ కు చేసిన ఇండియా నిర్ణీత 50 ఓవర్లలో 8 వికెట్ల నష్టానికి 349 పరుగులు చేసింది. టాస్ ఓడి మొదట బ్యాటింగ్ కు దిగిన టీమిండియాకు మంచి ఆరంభం లభించలేదు. ప్రారంభంలో రెండు బౌండరీలతో మంచి టచ్ లో కనిపించిన జైశ్వాల్ 18 పరుగుల వ్యక్తిగత స్కోర్ వద్ద ఔటయ్యాడు. ఈ దశలో సీనియర్ ప్లేయర్లు కోహ్లీ, రోహిత్ శర్మ ఇన్నింగ్స్ ను ముందుకు తీసుకెళ్లారు. సౌతాఫ్రికా బౌలర్లపై ఆధిపత్యం చూపిస్తూ భారీ భాగస్వామ్యాన్ని నెలకొల్పారు. ఇద్దరూ దూకుడుగా ఆడుతూ తమ హాఫ్ సెంచరీలు పూర్తి చేసుకున్నారు. 57 పరుగులు చేసిన రోహిత్.. జాన్సెన్ బౌలింగ్ లో ఔట్ కావడంతో కోహ్లీతో 136 పరుగుల భాగస్వామ్యానికి తెర పడింది. నాలుగో స్థానంలో బ్యాటింగ్ కు వచ్చిన గైక్వాడ్ కేవలం 8పరుగులు చేసి నిరాశపరిచాడు.
సుందర్ కూడా ఎక్కువ క్రీజ్ లో నిలవలేకపోయాడు. కేవలం 13 పరుగులకే పెవిలియన్ బాట పట్టాడు. దీంతో ఇండియా 200 పరుగుల వద్ద నాలుగో వికెట్ కోల్పోయింది. ఒక ఎండ్ లో వికెట్లు పడుతున్నా మరో ఎండ్ లో కోహ్లీ అద్భుతంగా బ్యాటింగ్ చేస్తూ వచ్చాడు. 18 ఓవర్లో కార్బన్ బాష్ బౌలింగ్ లో వరుసగా రెండు సిక్సర్లు కొట్టి స్టేడియంలో ఫ్యాన్స్ ను ఖుషీ చేశాడు. 47 బంతుల్లో హాఫ్ సెంచరీ పూర్తి చేసుకున్న విరాట్.. హాఫ్ సెంచరీ తర్వాత జాగ్రత్తగా ఆడుతూ సెంచరీ మార్క్ అందుకున్నాడు.
రాహుల్ తో కలిసి కీలక భాగస్వామ్యాన్ని నెలకొల్పి 102 బంతుల్లో తన సెంచరీ మార్క్ అందుకున్నాడు. కోహ్లీ వన్డే కెరీర్ లో ఇది 52వ సెంచరీ కావడం విశేషం. సెంచరీ తర్వాత వేగం పెంచిన విరాట్ బౌండరీలతో హోరెత్తించాడు. వేగంగా ఆడే క్రమంలో 120 బంతుల్లో 135 పరుగుల వద్ద ఔటయ్యాడు. రాహుల్, జడేజా వేగంగా ఆడుతూ జట్టు స్కోర్ ను 300 పరుగులు దాటించారు. ఈ క్రమంలో రాహుల్ తన హాఫ్ సెంచరీ పూర్తి చేసుకొని ఔటయ్యాడు. జడేజా 32 పరుగులు చేసి మంచి క్యామియో ఆడాడు.
Corbin Bosch kept India on edge till the end, but the hosts get the W in a Ranchi high-scorer
— ESPNcricinfo (@ESPNcricinfo) November 30, 2025
LIVE: https://t.co/OJm3attxYw | #INDvSA pic.twitter.com/joBiEP1oN9
