- ఈ నెల 14న చిన్నారికి జన్మనిచ్చిన బాలిక
వనపర్తి, వెలుగు: ఇంటర్‌ ఫస్ట్‌ ఇయర్‌ అమ్మాయి, నైన్త్‌ క్లాస్‌ బాలుడు ప్రేమించుకున్నారు. ఈ క్రమంలో బాలిక ఇటీవల పాపకు జన్మనిచ్చింది. తర్వాత బాలుడు తనకేమీ తెలియదని చెప్పడంతో బాధితురాలు పోలీసులను ఆశ్రయించింది. ఈ ఘటన వనపర్తి జిల్లాలో వెలుగు చూసింది. వివరాల్లోకి వెళ్తే... జిల్లా కేంద్రానికి సమీపంలోని ఓ గ్రామానికి చెందిన బాలిక, బాలుడు కొన్నిరోజులుగా ప్రేమించుకుంటున్నారు. ఈ క్రమంలోనే బాలిక గర్భవతి అయింది.
విషయం ఇంట్లో తెలియడంతో గ్రామంలో పంచాయితీ నిర్వహించగా.. బాలుడు తనకేమీ తెలియదని చెప్పాడు. దీంతో బాలిక కుటుంబ సభ్యులు వనపర్తి రూరల్‌ పోలీసులను కలిసి ఫిర్యాదు చేశారు. ఇదిలా ఉండగా.. బాలిక ఈ నెల 14న ఓ చిన్నారికి జన్మనిచ్చింది. అయినా బాలుడు గానీ, అతడి కుటుంబ సభ్యులు గానీ ఎవరూ రాకపోవడం, తమకు సంబంధం లేదని చెబుతుండడంతో బాలిక తల్లిదండ్రులు శనివారం ఎస్పీని కలిసి ఫిర్యాదు చేశారు. డీఎన్‌‌‌‌ఏ టెస్ట్‌ చేయించి తమకు న్యాయం చేయాలని బాలిక కుటుంబసభ్యులు కోరారు.
