హైదరాబాద్ మాదాపూర్ లోని లెమన్ ట్రీ రెడ్ ఫాక్స్ హోటల్ కు బాంబు బెదిరింపులు కలకలం రేపాయి. ఆదివారం ( నవంబర్ 30 ) ఉదయం 8 గంటలకు మెయిల్ ద్వారా బాంబు పెట్టినట్లు సమాచారం ఇచ్చారు గుర్తు తెలియని వ్యక్తి. మెయిల్ అందిన వెంటనే స్థానిక పోలీసులకు సమాచారం అందించారు హోటల్ సిబ్బంది. హోటల్ సిబ్బంది సమాచారంతో రంగంలోకి దిగిన మాదాపూర్ పోలీసులు బాంబు స్క్వాడ్, సెక్యూరిటీ వింగ్, డాగ్ స్క్వాడ్ లతో తనిఖీలు నిర్వహించారు.
సుమారు మూడు గంటల పాటు క్షుణ్ణంగా తనిఖీలు నిర్వహించిన పోలీసులు ఎలాంటి బాంబు కానీ.. పేలుడు పదార్థాలు కానీ లేవని నిర్దారించారు. దీంతో హోటల్ యాజమాన్యం ఊపిరి పీల్చుకుంది. ఈ ఘటనపై హోటల్ యాజమాన్యం ఫిర్యాదు మేరకు కేసు నమోదు చేసి దర్యాప్తు చేస్తున్నారు పోలీసులు.
బాంబు బెదిరింపులు ఆకతాయిల పనేనా లేక నిజంగా కుట్ర ఉందా అన్న కోణంలో దర్యాప్తు చేస్తున్నారు పోలీసులు. హైదరాబాద్ లో నిత్యం బిజీగా ఉండే మాదాపూర్ లాంటి ఏరియాలో ఉన్న హోటల్ కు బాంబు బెదిరింపులు రావడంతో సీరియస్ గా తీసుకున్నారు పోలీసులు. బెదిరింపు మెయిల్ పంపిన గుర్తు తెలియని వ్యక్తిని పట్టుకునే పనిలో పడ్డారు పోలీసులు.
