బిగ్ బాస్ తెలుగు సీజన్ 9 చివరి దశకు చేరుకుంది. దీంతో హౌస్ లో రోజురోజుకు వాతావరణం ఒక్కసారిగా హీటెక్కుతోంది. ఈ వారం ఎలిమినేషన్ ప్రక్రియ మరింత ఉత్కంఠగా మారింది. గత వారం ఎలిమినేషన్ జరగకపోవడంతో ఈ వారం తప్పకుండా డబుల్ ఎలిమినేషన్ ఉంటుందని అందరూ భావించారు. కానీ బిగ్ బాస్ షాకిచ్చారు. చివరికి ఉత్కంఠ భరితంగా సాగిన ఈ వారం ఎలిమినేషన్ రౌండ్‌లో చివరికి దివ్య హౌస్‌ను వీడాల్సి వచ్చింది. ఊహించినట్టే, తక్కువ ఓటింగ్ శాతం కారణంగా ఆమె ఎలిమినేట్ అయినట్లు తెలుస్తోంది.
అగ్నిపర్వతంలో విజయం ఎవరికి?
ఈ వారం ఎలిమినేషన్ రౌండ్ ఎప్పుడూ లేనంత ఆసక్తికరంగా సాగింది. చివరికి తక్కువ ఓట్లు వచ్చి డేంజర్ జోన్ లో ఉన్న దివ్య, సుమన్ శెట్టిని యాక్టివిటీ ఏరియాకు పిలిపించారు హోస్ట్ నాగార్జున. అక్కడ వారికి ప్రత్యేకంగా రూపొందించిన 'అగ్నిపర్వతం' సెటప్‌ను చూపించారు. నాగార్జున మాట్లాడుతూ.. మీ ముందు అగ్నిపర్వతాలు ఉన్నాయి. మీ పక్కన ఉన్న సొల్యూషన్ (లిక్విడ్) తీసుకుని దాన్ని అగ్నిపర్వతంలో పూర్తిగా పోసేయాలి. రంగు ఎరుపు వస్తే మీరు ఎలిమినేట్ అయినట్టు, ఆకుపచ్చ వస్తే మీరు సేఫ్ అయినట్టు అని ప్రకటించారు.
ఈ ఉత్కంఠభరితమైన రౌండ్‌లో, సుమన్ శెట్టి అగ్నిపర్వతంలో ద్రవాన్ని పోయగానే ఆకుపచ్చ రంగు వెలువడింది. దీంతో అతను సేఫ్ అయ్యాడు. ఇక దివ్య వంతు రాగా, ఆమె ద్రవాన్ని పోయగానే ఎరుపు రంగు రావడం వలన ఆమె ఎలిమినేట్ అయినట్లు అధికారికంగా ప్రకటించబడింది. దీంతో దివ్య ఇంటి దారి పట్టాల్సి వచ్చింది.
గత వారం తప్పించుకున్నా.. ఈ వారం ఔట్!
నిజానికి, దివ్య గత వారమే ఎలిమినేట్ కావాల్సిన కంటెస్టెంట్. గత వారం ఎలిమినేషన్ రౌండ్‌లో సంజన,దివ్య డేంజర్ జోన్‌లో ఉంది. అయితే అనూహ్యంగా కంటెస్టెంట్ ఇమ్ము తన వద్ద ఉన్న పవరాస్త్ర ను ఉపయోగించి ఆ వారం ఎలిమినేషన్‌ను రద్దు చేశాడు. ఇమ్ము పవరాస్త్ర వల్ల సేఫ్ అయిన దివ్య, ఈ వారం ఓటింగ్ తక్కువగా రావడంతో హౌస్ నుండి బయటకు వెళ్లక తప్పలేదు. ఈ వారం నిఖిత, సంజన, సుమన్ శెట్టి, డీమాన్ పవన్, భరణి వంటి కీలకమైన కంటెస్టెంట్లు డేంజర్ జోన్‌లో ఉన్నప్పటికీ, తొలి నుంచీ అత్యంత తక్కువ ఓటింగ్ దివ్యకే నమోదైంది. దీంతో ఈ వారం సింగిల్ ఎలిమినేషన్ జరగగా, దివ్య హౌస్ నుండి నిష్క్రమించింది.
దివ్య ఎలిమినేషన్‌కు కారణాలు ఇవేనా ?.
దివ్య హౌస్ నుండి బయటకు రావడానికి ప్రధాన కారణం ఆమె ప్రవర్తన, ముఖ్యంగా భరణి, తనూజలతో ఆమె వ్యవహరించిన తీరే అని ప్రేక్షకులు, నెటిజన్లు అభిప్రాయపడుతున్నారు. దివ్య, భరణితో ఏర్పరచుకున్న స్నేహం 'పెత్తనం' చెలాయించే విధంగా ఉందని చాలా మంది ప్రేక్షకులకు అనిపించింది. భరణిపై ఆమె చూపించిన 'ఓనర్‌షిప్' జనాలకు నచ్చలేదు. అంతే కాదు భరణి, తనూజతో మాట్లాడినా లేదా ఎక్కువ సమయం గడిపినా దివ్య వెంటనే గొడవ పెట్టుకోవడం, అసూయతో కూడిన సన్నివేశాలను సృష్టించడం ప్రేక్షకులలో ఆమె పట్ల నెగిటివిటీని పెంచింది.
మరో వైపు దివ్య డిమాండింగ్ స్వభావం కారణంగా భరణి తన సొంత ఆటను ఆడలేకపోతున్నాడని, అతని ఆట తగ్గిపోయిందని నెటిజన్లు బలంగా అభిప్రాయపడ్డారు. ఈ కారణంగా దివ్య బయటకు వెళితే భరణి తన ఆటను మెరుగుపరుచుకుంటాడు అనే ఆలోచనతో మిగతా కంటెస్టెంట్లకు ఓటింగ్ పెంచి, దివ్యకు తక్కువ ఓట్లు వేసినట్లు తెలుస్తోంది. దివ్య ఎలిమినేషన్‌తో బిగ్ బాస్ హౌస్‌లో ఇప్పుడు కేవలం 8 మంది కంటెస్టెంట్లు మాత్రమే మిగిలారు. ఈ వారం ఎలిమినేషన్ తర్వాత హౌస్‌లో గ్రూపులు, ఆటతీరులో ఎలాంటి మార్పులు వస్తాయో చూడాలి.
