ఈరోజుల్లో భార్యాభర్త ఇద్దరు పని చేస్తే తప్ప ఇల్లు గడవని పరిస్థితి.. ముఖ్యంగా సిటీల్లో భార్యాభర్తలు ఇద్దరు తప్పనిసరిగా ఉద్యోగాలు చేయాల్సిన పరిస్థితి. భార్యాభర్త ఇద్దరు ఉద్యోగాలకు వెళ్లాల్సి వచ్చినప్పుడు పిల్లలను చూసుకునేందుకు ఇంట్లో పెద్దవారు ఉంటే ఓకే.. లేకుంటే వేరేదారి లేక చిన్నపిల్లలను ఆయాల దగ్గర వదిలేసి వెళ్లక తప్పని పరిస్థితి. హైదరాబాద్ లోని జీడిమెట్లలో ఓ స్కూల్లో జరిగిన ఘటన చూస్తే పిల్లలను ఆయాల దగ్గర వదలాలంటే భయపడతారు. జీడిమెట్ల పరిధిలోని షాపూర్ లో జరిగిన ఈ ఘటనకు సంబంధించి వివరాలిలా ఉన్నాయి...
జీడిమెట్ల పరిధిలోని షాపూర్ లో ఉన్న పూర్ణిమ స్కూల్లో దారుణం జరిగింది. నర్సరీ చదువుతున్న చిన్నారిపై పైశాచికంగా దాడికి పాల్పడింది అదే స్కూల్లో పని చేస్తున్న ఆయా. ఈ ఘటనను స్థానిక యువకుడు సెల్ ఫోన్ లో రికార్డ్ చేశాడు. చిన్నారిపై ఆయా విచక్షణారహితంగా దాడి చేస్తున్న తీరు చూస్తే ఎవరికైనా కోపం రాకమానదు. ఆయా పాశవికంగా దాడి చేయడంతో శనివారం సాయంత్రం నుంచి బాధిత చిన్నారి ఆహారం తీసుకోవడం లేదు. ఈ క్రమంలో తీవ్ర జ్వరంతో బాధపడుతున్న చిన్నారిని ఆసుపత్రికి తీసుకెళ్లారు తల్లిదండ్రులు.
చిన్నారిపై పాశవికంగా దాడి జరిగినట్లు గుర్తించారు డాక్టర్లు. ఈ క్రమంలో పోలీసులకు ఫిర్యాదు చేశారు చిన్నారి తల్లిదండ్రులు. పాపపై జరిగిన దాడి వీడియో ఆధారంగా పోలీసులకు ఫిర్యాదు చేశారు తల్లిదండ్రులు. ఈ ఘటనపై కేసు నమోదు చేసిన పోలీసులు ఆయాను అదుపులోకి తీసుకున్నారు.
