హైదరాబాద్, వెలుగు : కేసీఆర్ మానస పుత్రిక ధరణి తప్పుల తడకని ఆయన ఎన్నికల అఫిడవిట్ ద్వారానే తేటతెల్లం అయ్యిందని వైఎస్సార్టీపీ చీఫ్ షర్మిల శనివారం ఒక ప్రకటనలో తెలిపారు. సీఎం భూమి రికార్డుల కన్నా ధరణిలో ఒక గుంట ఎక్కువగా నమోదైందని చెప్పారు. ఈ లెక్కన సామాన్యుల పరిస్థితి ఏమిటని ప్రశ్నించారు. రాష్ట్రంలో ఏ ఊరిలో చూసినా ధరణి గోసలే ఉన్నాయని, తహసీల్దార్ఆఫీస్ల నుంచి కోర్టుల దాకా ధరణి బాధలేనని విమర్శించారు.
రైతుల భూములు గుంజుకొని కోర్టుల చుట్టూ తిప్పుతూ ధరణే ధైర్యం అని చెప్పడానికి సిగ్గుండాలని ధ్వజమెత్తారు. ధరణి తిప్పలు తీరాలంటే దొర నియంత పాలనను బొంద పెట్టడం ఒక్కటే మార్గమన్నారు.
