- పర్యవేక్షణాధికారిగా జస్టిస్ జైన్ను నియమించిన సుప్రీంకోర్టు
న్యూఢిల్లీ: నలుగురు రైతులతో పాటు ఎనిమిది మందిని పొట్టన పెట్టుకుని దేశవ్యాప్తంగా సంచలనం సృష్టించిన లఖీంపూర్ ఖేరీ హింసాకాండపై విచారణ కీలక మలుపు తిరిగింది. సిట్ దర్యాప్తుపై పర్యవేక్షణకు పంజాబ్ హర్యానా హైకోర్టు మాజీ జడ్జి జస్టిస్ రాకేశ్ కుమార్ జైన్ను సుప్రీంకోర్టు బుధవారం నియమించింది. ‘‘యూపీ సర్కారు వేసిన సిట్ పారదర్శకంగా దర్యాప్తు చేసేలా ఆయన చూస్తారు. ఏ రోజుకారోజు పర్యవేక్షిస్తారు. ఆయన చార్జిషీట్, స్టేటస్ రిపోర్టు సమర్పించిన తర్వాత మళ్లీ విచారిస్తాం” అని సీజేఐ జస్టిస్ ఎన్వీ రమణ నేతృత్వంలోని బెంచ్ పేర్కొంది.
యూపీ సర్కారు ఇచ్చిన ఐపీఎస్ల లిస్టు నుంచి ఐజీ పద్మజా చౌహాన్తో పాటు మరో ఇద్దరు ఆఫీసర్లను సిట్లో భాగస్వాములను చేసింది. సిట్ దర్యాప్తుపై, పర్యవేక్షణకు వేసిన జ్యుడీషియల్ కమిషన్పై తమకు నమ్మకం లేదని గతంలో కోర్టు చెప్పడం తెలిసిందే. దాంతో సుప్రీంకోర్టు సూచించే వారినే పర్యవేక్షణాధికారిగా నియమిస్తామని నవంబర్ 15న యూపీ సర్కారు కోర్టులో అంగీకరించింది.
