- అన్ని జిల్లాల్లో సమీక్షలు నిర్వహిస్తాం : మంత్రి పొన్నం
హైదరాబాద్, వెలుగు: రాష్ట్రంలో ట్రాఫిక్ నిబంధనలను పక్కాగా అమలు చేస్తూ.. రోడ్డు ప్రమాదాలను నివారించేందుకే ఈ నెల 13 నుంచి 18 వరకు అరైవ్–అలైవ్ కార్యక్రమం నిర్వహిస్తున్నట్లు రాష్ట్ర రవాణా మంత్రి పొన్నం ప్రభాకర్ తెలిపారు. సోమవారం ఖైరతాబాద్ లోని ఆర్టీఏ కార్యాలయంలో ఆయన మీడియాతో మాట్లాడారు. ఈ 6 రోజుల్లో రాష్ట్రంలోని అన్ని జిల్లాల్లో రవాణా శాఖ తరఫున సమీక్షలు నిర్వహిస్తామని చెప్పారు. ప్రమాదాల నివారణ, ప్రాణ నష్టం జరగకుండా చూడటమే ఈ కార్యక్రమ ఉద్దేశమని పేర్కొన్నారు.
ఆర్టీసీలో 30 ఏండ్లుగా పని చేస్తూ ఒక్క యాక్సిడెంట్కూడా చేయని డ్రైవర్లను సన్మానిస్తామని తెలిపారు. రోడ్సేఫ్టీ మీటింగ్స్ప్రతి జిల్లాలో నిర్వహించాలని అధికారులను ఆదేశించారు. అంతకుముందు రవాణా శాఖ స్పెషల్ సీఎస్ వికాస్ రాజ్ తో కలిసి అరైవ్–అలైవ్ ప్రోగ్రామ్ కు సంబంధించిన పోస్టర్ ను రిలీజ్చేశారు.
పోచారం కాల్ చేయలేదు..
మంత్రులెవరూ తన ఫోన్లకు స్పందించడం లేదంటూ ప్రభుత్వ సలహాదారు, ఎమ్మెల్యే పోచారం శ్రీనివాస్ రెడ్డి చేసిన ఆరోపణలపై పొన్నం స్పందించారు. పోచారం తనకు కాల్ చేయలేదని, ఆయన నుంచి ఫోన్ వస్తే తప్పకుండా రెస్పాండ్ అవుతానన్నారు. ఇతర మంత్రులు ఏవైనా ముఖ్యమైన సమావేశాల్లో ఉన్నప్పుడు ఆయన కాల్ చేస్తే స్పందించకపోయి ఉండవచ్చని చెప్పారు.
