- ఎస్వీ రంగారావు మనవడు రంగారావు
- న్యాయం చేయాలని ప్రభుత్వానికి విజ్ఞప్తి
హైదరాబాద్ సిటీ, వెలుగు: తన తాత ఎస్వీ రంగారావు కొనుగోలు చేసిన ఇంటిని ఫోర్జరీ సంతకాలతో కబ్జా చేశారని, తమకు న్యాయం చేయాలని మనవడు రంగారావు ప్రభుత్వానికి విజ్ఞప్తి చేశారు. సోమాజిగూడ ప్రెస్ క్లబ్లో అడ్వకేట్ అంజన్ గౌడ్ తో కలిసి ఆయన మీడియాతో మాట్లాడారు. మాసబ్ ట్యాంక్ శాంతినగర్ లో 1966లో 446 చదరపు అడుగుల స్థలాన్ని తమ తాత ఎస్వీ రంగారావు కొనుగోలు చేసి ఇంటిని నిర్మించారని చెప్పారు. ఆ ఇంటిని 1995లో శ్రీనివాస్ అనే వ్యక్తికి లీజుకు ఇచ్చామన్నారు.
అతడు నమ్మకంగా ఉన్నట్టు నటించి 2007లో తమ సంతకాలు ఫోర్జరీ చేసి ఇంటిని స్వాధీనం చేసుకున్నారని చెప్పారు. మున్సిపల్ ట్యాక్స్ చెల్లించేందుకు వెళ్లినప్పుడు ఈ విషయం తెలిసిందన్నారు. కోర్టులో విచారణ నడుస్తుండగానే ఇంటిని కూల్చి నిర్మాణాలు చేపట్టారని చెప్పారు. న్యాయస్థానం ఆదేశాలను అమలు చేయడం లేదన్నారు. పోలీసులంతా శ్రీనివాస్కు మద్దతు పలుకుతున్నారని, అడిషనల్ డీసీపీ స్థాయి అధికారి బెదిరింపులకు పాల్పడుతున్నారని ఆరోపించారు. ఈ అంశంపై ప్రభుత్వం ప్రత్యేక దృష్టి సారించి విచారణ జరిపి న్యాయం చేయాలని కోరారు.
