ఆ ఊళ్ళో అడుగు పెడితే ఏ ఇంటి గోడ చూసినా అందమైన పెయింటింగ్లు కనిపిస్తాయి. ఇండ్ల లోపలి గోడలు, పైకప్పులపై కూడా రకరకాల బొమ్మలు ఉంటాయి. అంతెందుకు ఆ ఊరికి ఆనుకొని ఉన్న బీచ్లోని పడవల మీద కూడా జీవం ఉట్టిపడే బొమ్మలుంటాయి. ఇవే ఆ ఊరికి ప్రత్యేక గుర్తింపుతెచ్చాయి. అందుకే ఆరేండ్ల కిందటి వరకు ఎవరూ పట్టించుకోని ఆ ఊరు ఇప్పుడు ఏకంగా టూరిస్ట్ అట్రాక్షన్గా మారిపోయింది. ఆ ఊరే తామ్ థాన్. వియత్నాంలోని క్వాంగ్ నామ్ రాష్ట్రంలో ఉంటుంది తామ్ థాన్. ఒకవైపు ట్రుయాంగ్ గియాంగ్ నది, మరొకవైపు సముద్రం మధ్య ఉండే మత్స్యకార గ్రామమది. సుమారు వంద గడపలు ఉంటాయక్కడ. ఆ ఊళ్ళోని వాళ్ళంతా మత్స్యకారులే. చేపలు పట్టి, అమ్మి బతుకుతారు.
దశ మార్చిన పెయింటింగ్స్
హోయ్ ఆన్, టామ్ కియీ సిటీలను కలిపే మెయిన్ రోడ్కు ఆనుకొని ఉంటుంది తామ్ థాన్. ఆరేండ్ల కిందటి వరకు ఈ ఊరిని ఎవరూ పట్టించుకునేవాళ్ళు కాదు. 2016లో గ్రామానికి ఒక టీమ్ వచ్చింది. కొరియా–వియత్నాం జాయింట్ ప్రాజెక్ట్ అయిన ‘ఆర్ట్ ఫర్ ఎ బెటర్ కమ్యూనిటీ’కి చెందిన టీమ్ అది. అందులోని వాళ్ళంతా ఫేమస్ చిత్రకారులే. దాదాపు 17 మంది ఉన్న ఆ టీమ్లో ఆరుగురు కొరియా వాళ్ళు. మిగిలినవాళ్ళు వియత్నాంకు చెందిన వాళ్ళు. వీళ్ళంతా కలిసి ఆ ఊరిని ఒక కాన్వాస్గా చేసుకున్నారు. ఇండ్లు, గోడలు, ఆఖరికి ఊళ్ళోని రాళ్ళు, బండలపైన కూడా అద్భుతమైన పెయింటింగ్స్ వేశారు. అవి ఆ ఊరి సంప్రదాయాన్ని, సంస్కృతిని చెప్పేలా ఉంటాయి. చేపలు, వలలు, మత్స్యకారులు, వాళ్ల వృత్తులు ఈ బొమ్మల్లో కనిపిస్తాయి. దాంతో ఈ ఊరు అందమైన, అబ్బురపరిచే పెయింటింగ్స్తో నిండిపోయింది. ఇది టూరిస్ట్లను విపరీతంగా ఆకర్షించింది. ఊరికి అదనపు ఆదాయం తెచ్చింది. అలాగే ఊరి పేరును ఫేమస్ చేసింది.
బీచ్, ఐలాండ్, వీరమాత విగ్రహం
తామ్ థాన్కు దక్షిణ దిశలో బీచ్ ఉంది. హాయిగా సేదతీరడానికి చక్కటి ప్రదేశం ఇది. పెయింటింగ్స్తో కనిపించే పడవలు ఇక్కడ ప్రత్యేక ఆకర్షణ. అలాగే గ్రామానికి కొద్ది దూరంలో ‘తామ్ హై’ ఐలాండ్ ఉంది. ఇక్కడికి పడవల్లో వెళ్లి, ప్రకృతిని ఆస్వాదించొచ్చు. ఇక, గ్రామానికి ఆరు కిలోమీటర్ల దూరంలో ఉండే వీరమాత విగ్రహం స్పెషల్ అట్రాక్షన్. దీన్ని చూడడానికే ఏటా వేలాది మంది టూరిస్ట్లు ప్రత్యేకంగా వస్తుంటారు. 18వ శతాబ్దంలో జరిగిన యుద్ధంలో తన పిల్లలు, మనవళ్లను దేశం తరఫున సైన్యంలోకి పంపించిన వీరమాత విగ్రహం ఇది. 120 మీటర్ల వెడల్పు, 18మీటర్ల ఎత్తులో ఉండే ఈ విగ్రహాన్ని గ్రానైట్తో చేశారు. విగ్రహంలో వీరమాత పిల్లల ముఖాలు కూడా కనిపించేలా చెక్కారు. దేశం కోసం పిల్లలను త్యాగం చేసిన వీరమాతలకు గుర్తుగా ఈ విగ్రహాన్ని 2015లో వియత్నాం ప్రభుత్వం కట్టించింది. దీని కోసం 20మిలియన్ అమెరికన్ డాలర్లు(సుమారు 16కోట్ల రూపాయలను) ఖర్చు చేసింది.
ఇలా వెళ్ళాలి
యునెస్కో గుర్తింపు పొందిన ‘హోయ్ ఆన్’ సిటీకి 40 కిలోమీటర్ల దూరంలో తామ్ థాన్ ఉంటుంది. హోయ్ ఆన్ నుంచి బస్లు, టాక్సీలు, కార్లలో తామ్ థాన్కు వెళ్ళొచ్చు. గంట జర్నీ పడుతుంది. అలాగే బైక్లను అద్దెకు తీసుకొని కూడా వెళ్ళొచ్చు. ఒక్కరోజులోనే తామ్ థాన్తోపాటు చుట్టుపక్కల ప్రదేశాలన్నీ చూసి రావొచ్చు. తామ్ కియీ సిటీ నుంచి కూడా ట్రావెల్ ఫెసిలిటీ ఉంది.
