వీడియో పెట్టి యువకుడి ఆత్మహత్య
తంగళ్లపల్లి, వెలుగు: తన బతుకును పెద్ద మనుషులు, ఎస్సై కలిసి ఆగం చేశారంటూ వీడియో పెట్టి ఓ యువకుడు ఆత్మహత్య చేసుకున్నాడు. మృతదేహంతో కుటుంబీకులు ఆందోళనకు దిగడంతో గ్రామంలో ఉద్రిక్త పరిస్థితులు నెలకొన్నాయి. కుటుంబసభ్యులు తెలిపిన వివరాల ప్రకారం.. రాజన్నసిరిసిల్ల జిల్లా ఇల్లంతకుంట మండలం రహీంఖాన్పేట గ్రామానికి చెందిన రెబ్బల వెంకటేశ్, రేణుకకు ఇద్దరు కొడుకులు.చిన్నకొడుకు వంశీ(22) కరీంనగర్లో డిగ్రీ ఫైనలియర్ చదువుతున్నాడు. కాలేజీ లేకపోవడంతో మూడు నెలల క్రితం అదే గ్రామానికి చెందిన ఏనుగుల మల్లయ్య, ఆయన కొడుకు హరికృష్ణ కలిసి వంశీని గడ్డి కట్టలు కట్టడానికి పనికి తీసుకెళ్లారు. గడ్డి కట్టలు కట్టే సమయంలో వంశీ చేయి మెషిన్లో పడి నుజ్జయ్యింది. వెంటనే ఆసుపత్రిలో చేర్పించారు. హాస్పిటల్లో ఆ చేయిని తొలగించారు. జరిగిన ఘటనపై కేసు పెడదామని వెళుతుంటే గ్రామంలోని పెద్దమనుషులు న్యాయం చేస్తామని ఒప్పించారని తండ్రి వెంకటేశ్ చెప్పారు. రూ.10 లక్షలు వాయిదాల ప్రకారం ఇస్తామని చెప్పారన్నారు. మూడు నెలలు కావస్తున్నా పెద్దమనుషులు తమకు న్యాయం చేయకుండా వేధింపులకు గురి చేస్తుండడంతో మనస్తాపంతో తన కొడుకు శనివారం రాత్రి పురుగుల మందు తాగాడన్నారు. మెరుగైన చికిత్స కోసం కరీంనగర్కు తరలించగా ఆదివారం ఉదయం మరణించాడు. విషయం తెలుసుకున్న పోలీసులు గ్రామంలో భారీగా మోహరించారు. పోస్ట్మార్టం పూర్తైన తరువాత వంశీ డెడ్బాడీని స్వగ్రామానికి తీసుకువచ్చారు.
అంతా కలిసి గేమ్ ఆడిన్రు
ప్రమాదం జరిగి నెలలు గడుస్తున్నా తనకు న్యాయం జరగలేదని, ప్రమాదంలో చేయి కోల్పోవడంతో పైసల్ ఇప్పిస్తామని చెప్పి ఉల్లిగడ్డల మల్లారెడ్డి, హరికృష్ణ, కంకటి ప్రభాకర్, కనుకయ్య, జంగల రాజు, ఇల్లంతకుంట ఎస్సై, మరికొందరు పెద్దమనుషులు అంతా కలిసి గేమ్ ఆడి తన బతుకును ఆగం చేశారంటూ వంశీ చనిపోకముందు మాట్లాడిన వీడియో సోషల్ మీడియాలో వైరల్గా మారింది. అన్యాయంగా తన కొడుకును పొట్టన పెట్టుకున్నారని, న్యాయం చేయకుండా తమను ఇబ్బందులకు గురిచేశారని వంశీ కుటుంబసభ్యులు ఏనుగుల మల్లయ్య ఇంటిముందు డెడ్బాడీతో నిరసనకు దిగారు. దీంతో గ్రామంలో ఉద్రిక్త పరిస్థితులు నెలకొన్నాయి. గ్రామంలో పోలీసులు భారీగా మోహరించారు.