- గత ఏడాది ఫిబ్రవరిలో 14,526 మెగావాట్లే నమోదు
- సగటు విద్యుత్ వినియోగం కూడా పెరుగుదల
హైదరాబాద్, వెలుగు: నిరుడు ఫిబ్రవరితో పోలిస్తే ఈ ఫిబ్రవరిలో కరెంట్ డిమాండ్ పీక్ స్థాయిలో నమోదైంది. గత ఏడాది ఫిబ్రవరి నెల మొత్తం 14,526 మెగావాట్ల విద్యుత్ డిమాండ్ నమోదు కాగా.. ఈ ఫిబ్రవరిలో 23వ తేదీ వరకే 15,031 మెగావాట్ల డిమాండ్నమోదైంది. ఈ నెల పూర్తయ్యేందుకు ఇంకా ఐదు రోజులుండడంతో డిమాండ్ మరింత పెరిగే అవకాశం ఉంది. కాగా, జనవరి, ఫిబ్రవరిలో ఇప్పటిదాకా సగటు విద్యుత్ వినియోగం 256.74 మిలియన్ యూనిట్లకు చేరింది. గత ఏడాది ఇదే సమయానికి 242.95 మిలియన్ యూనిట్లుగా నమోదైంది.
దక్షిణ డిస్కంలలో ఈ నెలలో ఇప్పటివరకు 9,253 మెగావాట్ల డిమాండ్ నమోదు కాగా.. జనవరి, ఫిబ్రవరి నెలల్లో సగటు విద్యుత్ వినియోగం 169.36 మిలియన్ యూనిట్లుగా రికార్డ్ అయింది. నిరుడు ఫిబ్రవరిలో గరిష్ఠ విద్యుత్ డిమాండ్ 9,043 మెగావాట్లుకాగా.. సగటు వినియోగం 158.71 మిలియన్ యూనిట్లుగా ఉంది. గ్రేటర్ హైదరాబాద్ పరిధిలోనూ గత ఏడాదితో పోలిస్తే విద్యుత్ డిమాండ్ ఈ సారి గణనీయంగా పెరిగింది. గత ఏడాది ఫిబ్రవరిలో 2,930 మెగావాట్ల డిమాండ్ రికార్డ్ కాగా.. ఇప్పుడు 3,174 మెగావాట్లుగా రికార్డ్ అయింది. సగటు విద్యుత్ వినియోగం 57.34 మిలియన్ యూనిట్లుగా ఉంది. గత ఏడాది ఇది 51.69 మిలియన్ యూనిట్లుగా నమోదైంది.
