తమిళనాడు రాష్ట్ర రాజధాని చెన్నై నగరంలో దారుణం జరిగింది. ఐదేళ్ల బాలిక పై రెండు రాట్ వీలర్ కుక్కలు దాడి చేసి తీవ్రంగా గాయపరిచాయి. పోలీసులు కేసు నమోదు చేసి కుక్కల యజమానిని అరెస్ట్ చేశారు. కుక్కలను చూసుకునే మరో ఇద్దరిని ఈ కేసులో నిందితులుగా చేర్చారు. పోలీసులు అధికారులు తెలిపిన వివరాల ప్రకారం.. చెన్నైలోని థౌజండ్ లైట్స్ ఏరియాలోని పబ్లిక్ పార్కులో ఈ ఘటన జరిగింది.
పార్కులో యజమాని, కుక్కలను విడిచిపెట్టడంతో కుక్కలు బాలికపై దాడి చేశాయని అన్నారు. బాలిక తల్లిదండ్రులు ఆమెను రక్షించడానికిఅప్రమత్తం చేసే వరకు యజమాని జోక్యం చేసుకోలేదని ఆరోపించారు. బాలిక తండ్రి పార్కులో సెక్యూరిటీ గార్డుగా పనిచేస్తున్నాడని తాము యజమానిని అరెస్టు చేశామని తెలిపారు. కుక్కలను సంరక్షిస్తున్న మరో ఇద్దరిపై కేసు నమోదు చేసామని పోలీస్ అధికారి శేఖర్ దేశ్‌ముఖ్ తెలిపారు.
పార్క్‌లోని సీసీటీవీ ఫుటేజీలో ఆ రెండు కుక్కలు కనిపించాయి. సుదక్ష అనే ఐదేళ్ల బాలిక ఓ ప్రైవేట్ ఆస్పత్రిలో చికిత్స పొందుతోందని పోలీసులు తెలిపారు. క్రూరమైన జాతులకు చెందిన పెంపుడు జంతువుల దాడులు.. నివాస పరిసరాల్లో పెంపుడు జంతువులుగా ఉంచాలా వద్దా అనే చర్చకు దారితీస్తుంది. పిట్‌బుల్ టెర్రియర్, అమెరికన్ బుల్‌డాగ్, రోట్‌వీలర్ మరియు మాస్టిఫ్‌లతో సహా 23 జాతుల క్రూరమైన కుక్కల అమ్మకం, పెంపకాన్ని నిషేధించాలని మార్చిలో కేంద్రం రాష్ట్రాలను కోరింది. ఇప్పటికే ఈ జాతులను పెంపుడు జంతువులుగా కలిగి ఉన్నవారు వాటిని ఒకేసారి క్రిమిరహితం చేయాలని ఆదేశాలు జారీ చేసింది కేంద్రం
