తెలంగాణలో 43 మంది ఐఏఎస్ల బదిలీ..సచివాలయం నుంచి జిల్లాల దాకా భారీ మార్పులు

ఇరిగేషన్కు ఈ.శ్రీధర్, ఇండస్ట్రీస్కు ఎన్.శ్రీధర్
పంచాయతీరాజ్ స్పెషల్ సీఎస్గా సంజయ్ కుమార్..
జీఏడీ ముఖ్యకార్యదర్శిగా రాహుల్ బొజ్జా
మూడో డిస్కంకు కొత్త సీఎండీగా ముషారఫ్ అలీ ఫారూఖీ
ఆర్థిక, ప్రణాళికా విభాగాల కాdhaదర్శిగా గౌరవ్ ఉప్పల్
11 జిల్లాలకు కొత్త కలెక్టర్లు
సచివాలయం నుంచి జిల్లాల దాకా భారీ మార్పులు
ఉత్తర్వులు జారీ చేసిన సీఎస్ రామకృష్ణారావు

హైదరాబాద్, వెలుగు: రాష్ట్ర ప్రభుత్వం భారీ ఎత్తున ఐఏఎస్ అధికారులను బదిలీ చేసింది. పాలనాపరమైన అవసరాలు, ప్రభుత్వ ప్రాధాన్యతలను దృష్టిలో ఉంచుకుని ఏకంగా 43 మంది ఐఏఎస్లతో పాటు మరో ఇద్దరు ఉన్నతాధికారులకు స్థానచలనం కల్పిస్తూ సీఎస్ కె.రామకృష్ణారావు ఉత్తర్వులు జారీ చేశారు. సచివాలయ స్థాయిలో కీలక శాఖల కార్యదర్శులతోపాటు పెద్ద సంఖ్యలో జిల్లాల కలెక్టర్లను మార్చారు. 11 జిల్లాలకు ప్రభుత్వం కొత్త కలెక్టర్లను నియమించింది. పంచాయతీరాజ్, ఐటీ, పరిశ్రమలు, సాధారణ పరిపాలన, సాగునీటి పారుదల, ఆర్థిక శాఖల ఉన్నతాధికారుల మార్పు ఈ బదిలీల్లో ప్రాధాన్యం సంతరించుకుంది. పంచాయతీరాజ్, గ్రామీణాభివృద్ధి శాఖల స్పెషల్ సీఎస్గా సంజయ్ కుమార్‌ను నియమించారు.

ఆయన స్థానంలో ఐటీ, పరిశ్రమల శాఖల ముఖ్య కార్యదర్శిగా ఎన్ శ్రీధర్‌కు బాధ్యతలు అప్పగించారు. సాధారణ పరిపాలన, బీసీ సంక్షేమ శాఖల ముఖ్య కార్యదర్శిగా రాహుల్ బొజ్జాను బదిలీ చేస్తూ సర్కారు నిర్ణయం తీసుకుంది. ఆయన స్థానంలో నీటిపారుదల, క్యాడ్ శాఖల కార్యదర్శిగా ఈ. శ్రీధర్‌ను నియమించింది. ఆర్థిక, ప్రణాళికా విభాగాల కార్యదర్శిగా గౌరవ్ ఉప్పల్‌కు బాధ్యతలు అప్పగించింది. కొత్తగా ఏర్పాటు చేసిన మూడో డిస్కం చైర్మన్ అండ్ మేనేజింగ్ డైరెక్టర్‌గా ఎండీ ముషారఫ్ అలీ ఫరూఖీని నియమించింది. ఇప్పటికే ఆ డిస్కం పరిధి, ఉద్యోగుల పంపకంపై ఇప్పటికే ఉత్తర్వులు ఇచ్చిన విషయం తెలిసిందే. అలాగే దక్షిణ ప్రాంత విద్యుత్ పంపిణీ సంస్థ సీఎండీగా జితేష్ వి పాటిల్‌కు బాధ్యతలు అప్పగించింది. ఢిల్లీలోని తెలంగాణ భవన్ నుంచి గౌరవ్ ఉప్పల్‌ను బదిలీ చేసి, ఇక్కడ ఆర్థిక, ప్రణాళికా విభాగాల కార్యదర్శిగా పోస్టింగ్ ఇచ్చారు.

అలాగే విపత్తు నిర్వహణ, రెవెన్యూ శాఖల బాధ్యతలను ఎం దాన కిశోర్‌కు అదనంగా అప్పగించారు. ప్రభుత్వ ప్రాధాన్య సంక్షేమ పథకాల అమలు విభాగం స్పెషల్సీఎస్ సవ్యసాచి ఘోష్‌కు అదనంగా కార్పొరేట్ సామాజిక బాధ్యత విభాగం పగ్గాలు అప్పగించారు. కరీంనగర్ కలెక్టర్‌గా ఉన్న పమేలా సత్పతిని కార్మిక శాఖ ప్రత్యేక కమిషనర్‌గా, రాహుల్ రాజ్‌ను సహకార సంఘాల రిజిస్ట్రార్‌గా, బి.విజయేంద్రను గురుకులాల సొసైటీ కార్యదర్శిగా, ఎస్సీ అభివృద్ధి శాఖ కమిషనర్‌గా నియమించారు. వాస్తవానికి కొంతమంది సెక్రటరీలు కొంత కాలం కిందటే బదిలీ కాగా వారిని ఆయా శాఖల నుంచి తప్పించి వేరే స్థానానికి బదిలీ చేయడం ప్రస్తుతం చర్చనీయాంశంగా మారింది. కలెక్టర్ల విషయంలోనూ మంత్రులతో సఖ్యత లేకపోవడం, పనితీరు సరిగ్గా లేకపోవడం, ఇతర ఆరోపణలతోనే మార్పులు జరిగినట్లు తెలుస్తోంది.