హైదరాబాద్, వెలుగు: రాష్ట్ర అసెంబ్లీ ఎన్నికల్లో గెలిచి అధికారాన్ని చేపట్టిన కాంగ్రెస్ పార్టీ.. వచ్చే లోక్సభ ఎలక్షన్లలోనూ అదే జోరు చూపించనుందని ఏబీపీ సీఓటర్ సర్వే అంచనా వేసింది. లోక్‌‌సభకు ఇప్పటికిప్పుడు ఎన్నికలు జరిగితే 9 నుంచి 11 సీట్లను కాంగ్రెస్ గెలుచుకునే అవకాశాలున్నాయని శనివారం వెల్లడించింది. గతంలో 3 స్థానాలను గెలిచిన పార్టీ.. ఇప్పుడు అదనంగా మరో 6 నుంచి 8 సీట్లు ఎక్కువ గెలుస్తుందని స్పష్టం చేసింది. బీజేపీ, బీఆర్ఎస్‌‌కు గతంతో పోలిస్తే సీట్లలో భారీగా కోత పడే అవకాశమున్నట్టు చెప్పింది. గత పార్లమెంటు ఎన్నికల్లో బీఆర్ఎస్ 9 సీట్లను గెలుచుకోగా.. ఈసారి 3 నుంచి 5 స్థానాలకే పరిమితమవుతుందని తెలిపింది. బీజేపీ 1 నుంచి 3 స్థానాలు గెలిచే చాన్స్ ఉన్నట్టు పేర్కొంది. 1 నుంచి 2 సీట్లను ఇతరులు గెలుచుకుంటారని తెలిపింది.
ఒకవేళ బీఆర్ఎస్, బీజేపీ కలిసి రాష్ట్రంలో పోటీ చేస్తే మాత్రం కాంగ్రెస్కు కొంత దెబ్బ తగిలే అవకాశం ఉందని సీఓటర్ సంస్థ డైరెక్టర్ యశ్వంత్ దేశ్‌‌ముఖ్ అన్నారు. ఆ రెండు పార్టీలు కలిసి పోటీ చేస్తే 14కుపైనే సీట్లు గెలుచుకుంటాయని, అందులో 8కిపైగా బీజేపీనే గెలుస్తుందని ఆయన ఓ మీడియా సంస్థతో మాట్లాడుతూ పేర్కొన్నారు. కాగా, గతంతో పోలిస్తే లోక్ సభ ఎన్నికల్లో కాంగ్రెస్ ఓట్ షేర్ గతం కంటే భారీగా పెరుగుతుందని అంచనా వేసింది. 2019 లోక్సభ ఎన్నికల్లో 29.8 శాతం ఓట్లు రాగా.. ఇప్పుడు ఎన్నికలు జరిగితే 38 శాతం ఓట్లు పడతాయని పేర్కొంది.
