వేములవాడ, వెలుగు : రాష్ట్రంలో కృత్రిమ కరువు సృష్టించేందుకు బావబామ్మర్దులు హరీశ్రావు, కేటీఆర్ ప్రయత్నిస్తున్నారని ప్రభుత్వ విప్, వేములవాడ ఎమ్మెల్యే ఆది శ్రీనివాస్ విమర్శించారు. మంగళవారం రాజన్నసిరిసిల్ల జిల్లా వేములవాడ అర్బన్ మండలం అనుపురం, తెట్టకుంట, చీర్లవంచ గ్రామాల్లో గృహజ్యోతి కార్యక్రమాన్ని ప్రారంభించారు. ఈ సందర్భంగా ఆయన మాట్లాడుతూ రాష్ట్రంలో అమలు చేస్తున్న సంక్షేమ పథకాలు చూసి ఓర్వలేక కేటీఆర్, హరీశ్రావు కాంగ్రెస్ ప్రభుత్వంపై బురద చల్లుతున్నారని మండిపడ్డారు.
ఇటీవల కేటీఆర్, హరీశ్రావు మాట్లాడుతూ కాంగ్రెస్ వచ్చింది కరువు వచ్చింది అని మాట్లాడడం చూస్తే అసలు వారికి బుద్ధుండే మాట్లాడుతున్నారా అని అనిపిస్తోందన్నారు. ఎన్నికలకు ముందే మేడిగడ్డ కుంగిపోవడంతో తమ లోపాలు బయటపడతాయని బ్యారేజీలోని 7 టీఎంసీల నీటిని వదిలిపెట్టారన్నారు. అప్పటి ముఖ్యమంత్రి కేసీఆర్ అపర భగీరథుడని, తానే ఇంజనీర్ అని గొప్పలు చెప్పి రూ.లక్ష కోట్ల ప్రజాధనాన్ని దుర్వినియోగం చేశారని మండిపడ్డారు.రైతాంగానికి ఎలాంటి ఇబ్బంది తలెత్తకుండా నీరందించేందుకు ప్రత్యామ్నాయ ఏర్పాట్లు చేస్తున్నామన్నారు. కార్యక్రమంలో అర్బన్ మండల అధ్యక్షుడు పిల్లికనుకయ్య, జడ్పీటీసీ మ్యాకల రవి, ప్రభాకర్ రెడ్డి, ఎర్రం రాజు, సత్తయ్య తదితరులు పాల్గొన్నారు.
