ఇక ఒంటి పూట అంగన్ వాడీలు

•      ఉదయం 8 గంటల నుంచి మధ్యాహ్నం 12.30 గంటల వరకు నిర్వహణ
•     ఎండల దృష్ట్యా సర్కారు నిర్ణయం
•      నేడు ఉత్తర్వులు వచ్చే ఛాన్స్

హైదరాబాద్, వెలుగు: రాష్ట్రంలో ఎండలు దంచికొడుతున్నాయి. భానుడి భగభగలకు జనం బెంబేలెత్తుతున్నారు. ఈ నేపథ్యంలో చిన్నపిల్లల ఆరోగ్యాన్ని దృష్టిలో పెట్టుకొని ప్రభుత్వం కీలక నిర్ణయం తీసుకుంది. స్కూళ్ల మాదిరిగానే అంగన్​వాడీ కేంద్రాలనూ ఒంటిపూట నిర్వహించాలని నిర్ణయించింది.  రాష్ట్రంలో రోజురోజుకూ ఉష్ణోగ్రతలు పెరుగుతుండటంతో విద్యాశాఖ ఇప్పటికే స్కూళ్లకు హాఫ్ డేస్ ప్రకటించింది. 

ఈ నెల 15 నుంచి ఏప్రిల్ 23 వరకు ఉదయం 8 గంటల నుంచి మధ్యాహ్నం 12.30 గంటల వరకు తరగతులు నిర్వహించాలని సూచించింది. ఇదే పద్ధతిని అంగన్​వాడీ సెంటర్లలోనూ అమలు చేయాలని మహిళా, శిశు సంక్షేమ శాఖ మంత్రి సీతక్క అధికారులను ఆదేశించారు. ఈ మేరకు వారు కసరత్తు పూర్తి చేశారు. ఇందుకు సంబంధించిన ఉత్తర్వులు సోమవారం వచ్చే అవకాశం ఉంది.

వేసవి సెలవులూ ఇవ్వాలని..

ఎండల తీవ్రత దృష్ట్యా అంగన్​వాడీ కేంద్రాలను ఒంటిపూట నిర్వహించడంతోపాటు నెల రోజుల పాటు వేసవి సెలవులు కూడా ఇవ్వాలని అంగన్​వాడీ టీచర్స్ యూనియన్ ప్రతినిధులు గతంలో మంత్రి సీతక్కను కలిసి వినతిపత్రం అందించారు. దీనిపై ప్రభుత్వం సానుకూలంగా ఉందని, గతేడాది లాగే ఈసారీ వేసవి సెలవులపై త్వరలోనే ప్రకటన వచ్చే ఛాన్స్ ఉందని అధికారులు చెబుతున్నారు. అంగన్​వాడీ సెంటర్లు ఒంటిపూట నడిచినప్పటికీ.. చిన్నారుల పోషణ విషయంలో రాజీ పడొద్దని మంత్రి సీతక్క స్పష్టం చేశారు. టేక్ హోమ్​రేషన్ ద్వారా లబ్ధిదారుల నివాసాలకే పౌష్టికాహారం అందజేసేలా చర్యలు తీసుకోవాలని ఆఫీసర్లకు సూచించారు.