- బడ్జెట్కేటాయించని గత సర్కారు
- ఐటీడీఏలో నిరుపయోగంగా ఉన్న పరికరాలు
భద్రాచలం,వెలుగు : లిపిలేని, ఆదరణకు నోచుకోని ఆదివాసీ భాష, సంస్కృతిని కాపాడేందుకు భద్రాచలం మన్యానికి ప్రభుత్వం ప్రకటించిన ఆర్ట్ స్కూల్ అటకెక్కింది. ట్రైబల్ఆర్ట్స్కూల్ ఏర్పాటు చేయాలని ప్రతిపాదించినా గత ప్రభుత్వం బడ్జెట్ కేటాయించలేదు. దీంతో భద్రాచలం ఐటీడీఏలో స్కూల్ కోసం కేటాయించిన గది నిరుపయోగంగా పడిఉంది. రేపు, మాపు ఓపెనింగ్ చేస్తామంటూ ట్రైబల్ వెల్ఫేర్ డిపార్ట్మెంట్ కాలయాపన చేస్తుందన్న విమర్శలు వినిపిస్తున్నాయి.
గిరిజనుల సంస్కృతి,కళలను రక్షించాలని..
భద్రాచలం మన్యంలోని ఆదివాసీ కళాకారుడు సకిని రామచంద్రయ్య, అదిలాబాద్ ఏజన్సీలో గుస్సాడీ కళాకారుడు కనకరాజుకు 2022లో కేంద్ర ప్రభుత్వం పద్మశ్రీ అవార్డులను ప్రకటించింది. దాంతో గిరిజన కళల గొప్పతనం దేశమంతా తెలిసివచ్చింది. ఈ నేపథ్యంలో గిరిజనుల సంస్కృతి, కళల రక్షణ కోసం బీఆర్ఎస్ ప్రభుత్వం 2023లో ఆర్ట్ స్కూల్ ఏర్పాటు చేయనున్నట్లు ప్రకటించింది.
ఐటీడీఏ ప్రాంగణంలోని వైటీసీలో ఉన్న ట్రైబల్ మ్యూజియంలో ఓ గదిని కేటాయించారు. భద్రాచలం మన్యంలో దమ్మపేట, అశ్వారావుపేట, చర్ల, దుమ్ముగూడెం ఏరియాలోని ఆశ్రమ పాఠశాలల్లో డోలి, రేల, కొమ్ము నృత్యాలపై శిక్షణ ఇవ్వాలని నిర్ణయించారు. ట్రైనింగ్ ఇచ్చేందుకు ఐదు టీంలను ఎంపిక చేసి ఒక్కో టీంలో ఆదివాసీ సంస్కృతీసంప్రదాయాల్లో నిపుణులైన కళాకారులు, వాయిద్యకారులను నియమించారు.
ఈ స్కూల్కు పద్మశ్రీ అవార్డు గ్రహీత సకిని రామచంద్రయ్యను ప్రిన్సిపల్గా నియమించి.. ఆయనకు నెలకు రూ. 20వేల గౌరవ వేతనం ఇవ్వాలని భావించారు. శిక్షణకు ఏడాదికి రూ.15లక్షలు కేటాయించాలని ప్రభుత్వానికి ప్రతిపాదనలు పంపించారు. ఈ మేరకు జీవో రిలీజ్ చేసినా అప్పటి ప్రభుత్వం బడ్జెట్ ఇవ్వకపోవడంతో స్కూల్ ప్రారంభం కాలేదు.
గిరిజన కళలను కాపాడాలి
ఆదివాసీలకే సొంతమైన సంప్రదాయాలను కాపాడుకోవాల్సిన బాధ్యత ఉంది. ఆర్ట్ స్కూల్ తెరిస్తే విద్యార్ధుల్లో తమ కళల పట్ల అవగాహన పెరుగుతుంది.
- ముర్ల రమేష్,కొండరెడ్ల సంఘం
వ్యవస్థాపక అధ్యక్షులు
బడ్జెట్ రాలే
ఆర్ట్ స్కూల్ ఏర్పాటుకు అవసరమైన బడ్జెట్ ప్రతిపాదనలు పంపినం. కానీ ఇంకా రిలీజ్కాలేదు. రాగానే ఈ స్కూల్ ప్రారంభం అవుతుంది. బడ్జెట్ కోసం చూస్తున్నం.
- డేవిడ్రాజ్, ఏపీవో(జనరల్) ఐటీడీఏ
