బీఆర్ఎస్ టికెట్ పై పోటీ చేయడానికి సొంత పార్టీ నేతలే సిద్ధంగా లేరని బీజేపీ చీఫ్ బండి సంజయ్ అన్నారు. కేసీఆర్ పార్టీలో తెలంగాణ లేదని... ఉద్యమం పేరుతో కేసీఆర్ కుటుంబం దోచుకుందని ఆయన ఆరోపించారు. దేశంలో ఎక్కడ ఎన్నికలు జరిగినా డబ్బులు పంపుతున్నాడని కేసీఆర్ పై విమర్శలు గుప్పించారు. ప్రజలు మార్పు కోరుకుంటున్నారని ఆయన అన్నారు. బీఆర్ఎస్కు బీజేపీ మాత్రమే ప్రత్యామ్నాయం అని బండి పేర్కొన్నారు.
ఫిబ్రవరిలో ప్రధాని మోడీని తెలంగాణకు ఆహ్వానించి బూత్ కమిటీ సమ్మేళనం నిర్వహిస్తున్నామని బండి సంజయ్ అన్నారు. బీఎల్ సంతోష్ హైదరాబాద్ రావటానికి ఎవరి పర్మిషన్ అవసరం లేదన్నారు. 90 అసెంబ్లీ సీట్లలో గెలుపే లక్ష్యంగా ముందుకు వెళుతున్నామని చెప్పారు. బీజేపీకి ప్రతి నియోజకవర్గాల్లో బలమైన అభ్యర్థులున్నారని అన్నారు. బీజేపీకి అభ్యర్థులు లేరనేది ఒక వర్గం ప్రచారం మాత్రమేనని కొట్టిపారేశారు. తెలంగాణలో నాలుగంచెల వ్యూహంతో ముందుకు వెళతామని బండి సంజయ్ స్పష్టం చేశారు.
