భద్రాద్రికొత్తగూడెం/ దమ్మపేట, వెలుగు: మీ పిల్లలకు కూడా ఇట్లాంటి అన్నమే పెడ్తారా అంటూ భద్రాద్రికొత్తగూడెం కలెక్టర్ అంకిత్ హెచ్ఎంలు, టీచర్లు, వంట సిబ్బందిపై మండిపడ్డారు. బుధవారం దమ్మపేట తహసీల్దార్ ఆఫీస్లో అన్ని విభాగాలను తనిఖీ చేశారు. అనంతరం తెలంగాణ గిరిజన సంక్షేమ బాలుర ఉన్నత పాఠశాలతో పాటు పలు స్కూల్స్ను ఆకస్మికంగా తనిఖీ చేశారు. భోజనాన్ని రుచి చూసి ఆగ్రహం వ్యక్తం చేశారు. మెనూ ప్రకారం చికెన్ బగారా రైస్ వడ్డించాల్సి ఉన్నప్పటికీ ఎందుకు వండలేదని ప్రశ్నించారు.
నాణ్యతతో కూడిన పోషక విలువలు కలిగిన ఆహారాన్ని అందించాలన్నారు. భవిష్యత్తులో నిర్లక్ష్యంగా వ్యవహరిస్తే సీరియస్గా యాక్షన్ తీసుకుంటానని హెచ్చరించారు. స్టూడెంట్స్ చేతులు శుభ్రం చేసుకునే ప్రదేశంలో నల్లాలకు ఆన్ ఆఫ్ ట్యాప్లు లేకపోవడం, అపరిశుభ్రతపై సీరియస్ అయ్యారు. ఆయన వెంట తహసీల్దార్ రాం నరేశ్, ఎంపీడీవో రవీందర్ రెడ్డి, ఎంఈవో జగదీశ్ ఉన్నారు.
