- బీఆర్ఎస్ నేతలకు అసలు బుద్ధి ఉందా?
- డిప్యూటీ సీఎం భట్టి విక్రమార్క ఫైర్ గత సర్కార్ పెట్టిన యాదాద్రి ప్లాంట్ వల్ల ఏటా రూ.1,600 కోట్ల నష్టం
- 250 కి.మీ. నుంచి బొగ్గు తేవాలంటే
- రవాణా ఖర్చులు తడిసిమోపెడు
- బొగ్గు ఉన్న చోట మేం థర్మల్ పవర్ ప్లాంట్లు పెడ్తున్నం
- అది కూడా కేంద్ర ప్రభుత్వ మార్గదర్శకాల ప్రకారమే!
- 50% థర్మల్ విద్యుత్ లేకపోతే గ్రిడ్లు కూలే ప్రమాదం
- పవర్ అక్రమాలపై లీగల్ డిపార్ట్మెంట్ స్టడీ చేస్తున్నది
- రిపోర్ట్ రాగానే అన్నీ బయటపడ్తయ్.. టైమ్ విల్ కమ్
- కాళేశ్వరంపై కేసీఆర్ కుటుంబీకులే ప్రశ్నిస్తున్నరు
- ఆ ప్రశ్నలకు సమాధానం చెప్పలేక
- ప్రజలను తప్పుదోవ పట్టిస్తున్నరని వ్యాఖ్య
హైదరాబాద్, వెలుగు: థర్మల్ పవర్ ప్లాంట్లకు తాము ఇంకా టెండర్లు కూడా పిలువలేదని, అప్పుడే అవినీతి జరిగిందంటూ బీఆర్ఎస్ నేతలు ఆరోపిస్తున్నారని డిప్యూటీ సీఎం భట్టి విక్రమార్క మండిపడ్డారు. ‘‘బీఆర్ఎస్ నేతలకు అసలు బుద్ధి ఉందా? వాళ్ల హయాంలో అమలు చేసిన అవినీతి విధానాలే కొనసాగాలని కోరుకుంటున్నరా? థర్మల్ ప్లాంట్ల కోసం టెండర్లన్నా పిలువలేదు.
రూ. 50 వేల కోట్ల స్కామ్ జరిగిందని బీఆర్ఎస్ వాళ్లు ప్రజలను పక్కదోవ పట్టించాలని చూస్తున్నరు. రాజకీయ ఉనికి కోసం బట్టకాల్చిమీద వేయడం కరెక్ట్ కాదు” అని హెచ్చరించారు. శనివారం ప్రజా భవన్లో విద్యుత్ శాఖ పాలసీపై భట్టి పవర్ పాయింట్ ప్రజెంటేషన్ ఇచ్చారు. అనంతరం మీడియాతో మాట్లాడారు.
ఎక్కడ బొగ్గు ఉత్పత్తి జరుగుతుందో అక్కడే థర్మల్ పవర్ ప్లాంట్లు ఏర్పాటు చేయాలని తాము ప్రతిపక్షంలో ఉన్నప్పుడు పోరాటాలు చేసిన మాట వాస్తవమని గుర్తుచేశారు. రామగుండంలో థర్మల్ పవర్ ప్లాంట్ ఏర్పాటు చేస్తే అక్కడికి బొగ్గు రవాణా చాలా సులభంగా జరుగుతుందని, తద్వారా రవాణా భారం తగ్గుతుందన్నారు.
‘‘దగ్గర్లో బొగ్గు గనులు లేకున్నా మీరు యాదాద్రిలో ప్లాంట్ పెట్టారు. 250 కి.మీ నుంచి బొగ్గు తీసుకురావడానికి రవాణా ఖర్చులు తడిసిమోపడవుతున్నయ్. దీని మూలంగా ప్రభుత్వానికి ఏటా రూ.1,600 కోట్ల నష్టం వస్తున్నది. రాబోయే 25 ఏండ్లలో రూ.40 వేల కోట్ల నష్టాన్ని మీ వల్ల రాష్ట్ర ప్రజలు భరించాల్సి వస్తుంది’’ అని బీఆర్ఎస్ నేతలపై డిప్యూటీ సీఎం ఆగ్రహం వ్యక్తం చేశారు.
గత బీఆర్ఎస్ పాలకులు చేసిన తప్పుల వల్ల రాష్ట్రానికి భారీ నష్టం వాటిల్లుతున్నదన్నారు. తాము కోల్ ఉన్నచోటే ప్లాంట్ పెడతున్నామని తెలిపారు. అది కూడా కేంద్ర ప్రభుత్వ మార్గదర్శకాల ప్రకారమే చేస్తున్నామన్నారు. గ్రీన్ఎనర్జీ పాలసీలోనే 50 శాతం థర్మల్ విద్యుత్ఉండాలనే నిబంధన ఉందని, థర్మల్ విద్యుత్గనుక లేకపోతే గ్రిడ్లు కుప్పకూలే ప్రమాదం ఉందని చెప్పారు.
ఈ విషయం తెలిసినప్పటికీ తమపై కావాలని బురద జల్లుతున్నారని బీఆర్ఎస్ నేతలపై ఆయన మండిపడ్డారు. 2025 ఏప్రిల్ నెలలో ఫ్రాన్స్, పోర్చుగల్, స్పెయిన్లో జరిగిన నష్టం మనమంతా కండ్లారా చూశామని గుర్తుచేశారు. అలాంటి ప్రమాదం రాకుండా చర్యలు తీసుకుంటున్నామని చెప్పారు.
పవర్ అక్రమాలపై రిపోర్ట్ రెడీ అవుతున్నది
గత బీఆర్ఎస్ ప్రభుత్వంలో జరిగిన పవర్ అక్రమాలపై రిపోర్ట్ను లీగల్ డిపార్ట్ మెంట్ స్టడీ చేస్తున్నదని డిప్యూటీ సీఎం భట్టి విక్రమార్క తెలిపారు. పవర్ రిపోర్ట్ రాగానే అన్నీ బయటపడతాయన్నారు. ‘టైమ్ విల్ కమ్’ అని పేర్కొన్నారు. ‘‘కాళేశ్వరం ప్రాజెక్ట్ అవినీతి గురించి స్వయంగా కేసీఆర్ కుటుంబంలోని ఓ వ్యక్తి ప్రశ్నిస్తున్నారు. ఆ ప్రాజెక్ట్ నిర్మాణంలో భారీ కుంభకోణం జరిగినట్లు చెప్పారు. దీంతో పార్టీ కుప్పకూలిపోతుందనే భయం వారికి పట్టుకుంది. దీనిని తట్టుకోలేక ఆమె ప్రశ్నలకు జవాబులు చెప్పలేక, ప్రజలను తప్పుదోవ పట్టించేందుకు బీఆర్ఎస్ నేతలు ప్రయత్నం చేస్తున్నారు’’ అని ఆయన విమర్శించారు. యాదాద్రి పవర్ ప్లాంట్ ఏర్పాటు విషయంలో 2017లో ప్రజాభిప్రాయం ప్రకారమే తాము పోరాటాలు చేశామన్నారు.
ప్రజలకిచ్చిన హామీ మేరకే రామగుండం థర్మల్ ప్లాంట్: శ్రీధర్ బాబు
రామగుండం ఏరియాలో థర్మల్ పవర్ ప్లాంట్ ఏర్పాటు చేసి స్థానికులకు ఉద్యోగ, ఉపాధి అవకాశాలు కల్పిస్తామని గతంలో తామిచ్చిన హామీ మేరకు అక్కడ పవర్ ప్లాంట్ ఏర్పాటు చేస్తున్నట్లు మంత్రి శ్రీధర్బాబు వెల్లడించారు. తాము రాష్ట్రాభివృద్ధిని ఆకాంక్షిస్తూ, ప్రజల కోరిక మేరకు అనువైన స్థలంలో బొగ్గు అందుబాటులో ఉన్న ఏరియాలో థర్మల్ పవర్ ప్లాంట్ పెడుతున్నామని చెప్పారు.
‘‘మీలా ఎక్కడో 250 కి.మీ దూరం నుంచి బొగ్గు తీసుకొచ్చి యాదాద్రిలో థర్మల్ విద్యుదుత్పత్తి చేయడానికి ప్రభుత్వ సొమ్మును కాజేసే ప్రయత్నం చేయడం లేదు” అని బీఆర్ఎస్ నేతలపై ఆగ్రహం వ్యక్తం చేశారు. ‘‘రూ. 50 వేల కోట్ల స్కాం అంటూ బీఆర్ఎస్ నేతలు పచ్చకామెర్లు వచ్చినోళ్ల మాదిరిగా మాట్లాడటం సరికాదు.
ఇక్కడ ఎన్టీపీసీ, జెన్కో, పీపీఏలో ఎవరైనా తక్కువ ధరలకు టెండర్లు కోడ్ చేసిన వాళ్లకే పనుల బాధ్యతలను ప్రభుత్వం అప్పగిస్తుంది. తద్వారా ప్రజాధనం దుర్వినియోగం కాకుండా పరిరక్షిస్తం” అని ఆయన తెలిపారు. ఈ సమావేశంలో మంత్రి పొన్నం ప్రభాకర్ కూడా పాల్గొన్నారు.
