యాదాద్రి, వెలుగు: రిపబ్లిక్ డే సెలబ్రేషన్స్ టైమ్లో గాంధీ ఫొటో పెట్టాల్సిన అవసరం లేదని భువనగిరి ఎమ్మెల్యే పైళ్ల శేఖర్రెడ్డి అన్నారు. యాదాద్రి జిల్లా భువనగిరిలో ‘కరెన్సీపై అంబేద్కర్ ఫొటో సాధన సమితి’ నిర్వహించిన జ్ఞానయుద్ధ సభలో అంబేద్కర్కు జ్ఞానమాల సమర్పించిన అనంతరం ఆయన మాట్లాడారు. అంబేద్కర్ కారణంగానే గణతంత్ర దినోత్సవం రోజు మనం జెండా ఎగురవేస్తున్నామన్నారు. అలాంటప్పుడు గాంధీజీ ఫొటో అవసరం లేదన్నది కరెక్టే. కానీ గాంధీజీతో పాటు అంబేద్కర్ ఫొటో పెట్టాల్సిన అవసరం వంద శాతం ఉంది అని చెప్పారు. తప్పకుండా ఈసారి అన్ని ప్రభుత్వ, ప్రైవేట్ ఆఫీసుల్లో అంబేద్కర్ ఫొటో ఏర్పాటు చేయిస్తానని హామీ ఇచ్చారు. కరెన్సీ నోట్లపై అంబేద్కర్ ఫొటో పెట్టాలని డిమాండ్ చేశారు. ఈ విషయంలో సీఎం కేసీఆర్తో తాను మాట్లాడుతానని చెప్పారు.
