బీజేపీ నుంచి బీసీ క్యాండిడేట్!..జూబ్లీహిల్స్ బరిలో నిలిపేందుకు కమలం పార్టీ వ్యూహం

•     రెండ్రోజుల క్రితమే పార్లమెంటరీ కమిటీ సమావేశం

హైదరాబాద్, వెలుగు: జూబ్లీహిల్స్ ఉప ఎన్నికల్లో బీసీ అభ్యర్థిని బరిలో నిలపాలని బీజేపీ భావిస్తున్నది.  బలమైన బీసీ అభ్యర్థి కోసం వేట మొదలుపెట్టింది. అందుకే అభ్యర్థి ప్రకటన ఆలస్యమవుతున్నట్లు తెలిసింది. క్యాండిడేట్​ ఎంపిక కోసం బీజేపీ రాష్ట్ర అధ్యక్షుడు రాంచందర్​రావు ఇటీవల త్రిసభ్య కమిటీ వేసిన సంగతి తెలిసిందే. విశ్వసనీయ సమాచారం ప్రకారం.. ఆ కమిటీ మూడు పేర్లను సిఫార్సు చేయగా, రాంచందర్‌‌‌‌రావు ఆ లిస్టుతో ఢిల్లీ వెళ్లారు.

 కానీ ఆ పేర్లను చూసి రాష్ట్ర నాయకత్వంపై హైకమాండ్ సీరియస్​ అయినట్లు తెలిసింది. రాష్ట్రంలో ఓ వైపు బీసీ రిజర్వేషన్లపై సీరియస్​గా చర్చ జరుగుతుండడం, అధికారపార్టీ కాంగ్రెస్​ బీసీ అభ్యర్థికి టికెట్​ఇచ్చిన నేపథ్యంలో.. బీజేపీ నుంచి కూడా బీసీ అభ్యర్థిని రంగంలో నిలపాలని ఆదేశించినట్టు సమాచారం. దీంతో రాంచందర్‌‌‌‌రావు ఉత్త చేతులతోనే  తిరిగివచ్చినట్లు ఆ  పార్టీలో చర్చ నడుస్తున్నది. 

బీసీ అభ్యర్థి కోసం గాలింపు..

రాష్ట్ర రాజకీయాల్లో ప్రస్తుతం బీసీ గాలి వీస్తున్నది. లోకల్ బాడీ ఎన్నికల్లో 42 శాతం బీసీ రిజర్వేషన్ల అమలు కోసం రాష్ట్ర సర్కారు తెచ్చిన బిల్లులు రాష్ట్రపతి వద్ద, పంచాయతీరాజ్​చట్ట సవరణ బిల్లు గవర్నర్​ వద్ద పెండింగ్​ పడ్డాయి. ఈ క్రమంలో బీసీ రిజర్వేషన్లపై  హైకోర్టు స్టే ఇవ్వడంతో బీసీ సంఘాలన్నీ బీజేపీ తీరును ఎండగడ్తున్నాయి. ఈ క్రమంలోనే జూబ్లీహిల్స్​ ఉప ఎన్నికల్లో బలమైన బీసీ అభ్యర్థికి టికెట్​ఇవ్వడం ద్వారా కాంగ్రెస్​ తాను బీసీ పక్షపాతినని చాటిచెప్పింది. కానీ.. బీజేపీ రాష్ట్ర నాయకత్వం రెడ్డి సామాజిక వర్గానికి చెందిన దీపక్‌‌రెడ్డి, కీర్తిరెడ్డి పేర్లతో ఢిల్లీకి వెళ్లడంతో హైకమాండ్​.. క్లాస్​ ఇచ్చినట్టు తెలిసింది. 

పలు పేర్లు పరిశీలన..

జూబ్లీహిల్స్ ​నియోజకవర్గ పరిధిలో బీజేపీ నుంచి బరిలో నిలిపేందుకు బలమైన బీసీ నేతల కోసం ఆ పార్టీ నేతలు జల్లెడపడ్తున్నారు. ఆ పార్టీ యువ నేత విక్రమ్‌‌గౌడ్ సహా పలువురి పేర్లను పరిశీలిస్తున్నారు. వీరంతా బలమైన నేతలు కాకపోవడంతో ఇతర పార్టీలోని బీసీ నేతలను, ముఖ్యంగా టికెట్​ దక్కని అసంతృప్తుల కోసం ప్రయత్నిస్తున్నారు. మరోవైపు నామినేషన్ల ప్రక్రియ ప్రారంభమైనా.. ఇంతవరకూ అభ్యర్థిని ప్రకటించకపోవడంతో పార్టీ లీడర్లు, కేడర్‌‌‌‌​నారాజ్‌‌గా ఉన్నది. కాగా, మంగళవారం మధ్యాహ్నం కల్లా అభ్యర్థిని ప్రకటించే అవకాశం ఉందని ఆ పార్టీకి చెందిన ఓ సీనియర్​ నేత ‘వెలుగు’కు తెలిపారు.