5న హైదరాబాద్లో పార్టీ అధికార ప్రతినిధులు,సోషల్ మీడియా ఇన్చార్జ్లకు ఓరియంటేషన్ క్లాసులు
హైదరాబాద్, వెలుగు: రాష్ట్రంలో ఎన్నికలు సమీపిస్తుండడంతో మీడియా, సోషల్ మీడియాలో యాక్టివ్ గా ఉండేందుకు బీజేపీ కసరత్తు చేస్తున్నది. బీఆర్ఎస్, కాంగ్రెస్ తప్పుడు ప్రచారాలపై ఎప్పటికప్పుడు కౌంటర్ ఎటాక్ చేసేందుకు బీజేపీ రాష్ట్ర నాయకత్వం తమ టీమ్లను మరింత యాక్టివ్ చేసే పనిలో పడింది. అన్ని జిల్లాల బీజేపీ అధికార ప్రతినిధులు, జిల్లాల సోషల్ మీడియా ఇన్చార్జ్లతో ఈనెల 5న పార్టీ స్టేట్ ఆఫీసులో వర్క్ షాపు నిర్వహించనున్నారు. మీడియా, సోషల్ మీడియాపై మంచి అనుభవం ఉన్న పార్టీ రాష్ట్ర, జాతీయ స్థాయి నేతలతో వారికి ఓరియంటేషన్ క్లాస్ చెప్పించనున్నారు. బీజేపీపై తప్పుడు ప్రచారాలకు ఏ రీతిలో కౌంటర్ ఇవ్వాలనే దానిపై ఇందులో వివరించనున్నారు.
7న ‘డబుల్ ఇండ్ల’ ధర్నా
అర్హులైన పేదలందరికి వెంటనే డబుల్ బెడ్ రూమ్ ఇండ్లు ఇవ్వాలని రాష్ట్ర ప్రభుత్వంపై ఒత్తిడి తేవడంలో భాగంగా 7న ఇందిరా పార్కు వద్ద ధర్నా నిర్వహించ నున్నారు. ఈ ఆందోళనను జూన్25న నిర్వహించాల్సి ఉండగా.. వర్షాల కారణంగా ఈ నెల 2కు వాయిదా వేశారు. పార్లమెంట్ సమావేశాల నేపథ్యంలో ఎంపీలకు విప్ జారీ చేయడంతో కిషన్ రెడ్డి ఢిల్లీలోనే ఆగిపోవాల్సి వచ్చింది. దీంతో ఇది మళ్లీ వాయిదా పడింది. ఈ నెల 7న నిరసన ప్రోగ్రామ్ నిర్వహించాలని తాజాగా నిర్ణయించారు.
