కోయగూడెం, జేవీఆర్ బ్లాకులు సింగరేణికే ఇవ్వాలి

•     కేంద్ర మంత్రి కిషన్‌‌‌‌‌‌‌‌‌‌‌‌‌‌‌‌రెడ్డికి బీఎంఎస్, ఏబీకేఎంఎస్ వినతి 

హైదరాబాద్, వెలుగు: ప్రైవేట్ సంస్థలకు అప్పగించిన కోయగూడెం ఓసీ3, జేవీఆర్ ఓసీ3 బొగ్గు బ్లాకులను సింగరేణి సంస్థకు కేటాయించాలని సింగరేణి కోల్ మైన్స్ కార్మిక సంఘ్ (ఏబీకేఎంఎస్-బీఎంఎస్) లీడర్లు కేంద్ర బొగ్గు శాఖ మంత్రి జి.కిషన్​రెడ్డిని కోరారు. ఆదివారం హైదరాబాద్‌‌‌‌‌‌‌‌‌‌‌‌‌‌‌‌లోని ఆఫీస్‌‌‌‌‌‌‌‌‌‌‌‌‌‌‌‌లో మంత్రిని కలిసి ఈ మేరకు రిక్వెస్ట్ చేశారు. మణుగూరు పీకేఓసీ2 డిప్ సైడ్ కోల్ బ్లాక్ సింగరేణికి దక్కేలా చొరవ తీసుకున్నందుకు కేంద్రమంత్రికి కృతజ్ఞతలు చెప్పారు. గతంలో బీఆర్‌‌‌‌‌‌‌‌‌‌‌‌‌‌‌‌ఎస్ ప్రభుత్వ హయాంలో సింగరేణి యాజమాన్యాన్ని ఈ బొగ్గు బ్లాకుల వేలం ప్రక్రియలో పాల్గొనకుండా అడ్డుకుని, ప్రైవేట్ సంస్థలకు కేటాయించేలా నిర్ణయాలు తీసుకున్నారని ఆ సంఘం జాతీయ నాయకులు మాధవ నాయక్ ఆరోపించారు. 

సింగరేణికి కొత్త గనులు అందుబాటులోకి రాకపోవడంతో ఇప్పటికే ఉన్న గనుల బొగ్గు నిల్వలు తగ్గిపోతున్నాయని, కొన్ని గనులు మూసివేత దశకు చేరుకోవడంతో ఈ ఏడాది సుమారు 12 మిలియన్ టన్నుల బొగ్గు ఉత్పత్తి తగ్గే పరిస్థితి ఏర్పడిందని కేంద్ర మంత్రికి తెలిపారు. ‘సింగరేణి బొగ్గు ఉత్పత్తికి పుట్టినిల్లు అయిన ఇల్లందు ప్రాంతం నేడు కొత్త గనులు లేక తీవ్ర ఇబ్బందులను ఎదుర్కొంటోంది. ఈ ఏరియాలో గనులు తగ్గిపోవడంతో అక్కడ పనిచేస్తున్న కార్మికులను ఇతర ఏరియాలకు బదిలీ చేస్తున్నారు. ఫలితంగా స్థానిక ప్రజల ఉపాధి అవకాశాలు, ఆ ప్రాంత ఆర్థిక వ్యవస్థ దెబ్బతింటున్నాయి’ అని నాయకులు తీవ్ర ఆవేదన వ్యక్తం చేశారు.

సానుకూలంగా స్పందించిన కేంద్ర మంత్రి.. 

సింగరేణి కార్మిక సంఘాల నాయకులు ఇచ్చిన విజ్ఞప్తిపై కేంద్ర మంత్రి జి.కిషన్​ రెడ్డి సానుకూలంగా స్పందించారు. కోయగూడెం, జేవీఆర్​ ఓసీ బొగ్గు బ్లాకులను చట్టం అనుకూలిస్తే సింగరేణికి కేటాయించేలా తన వంతు ప్రయత్నం చేస్తానని హామీ ఇచ్చారు. రాష్ట్రంలో సింగరేణి కార్మికులకు ఉద్యోగ భద్రత, స్థానిక ప్రజలకు ఉపాధి అవకాశాలు కల్పించేందుకు కేంద్ర ప్రభుత్వం కృషి చేస్తుందన్నారు. కార్యక్రమంలో ఆ సంఘాల నాయకులు అప్పానీ శ్రీనివాస్,  వడ్డేపల్లి కుమార్ స్వామియాదగిరి సత్తయ్య, జీవీ కృష్ణారెడ్డి,  సాయి వేణి సతీష్,  లీలా కృష్ణ,  సుజేందర్, నరసింహ రావు తదితరులు పాల్గొన్నారు.