భీమదేవరపల్లి, వెలుగు: కడుపు నొప్పితో హాస్పిటల్‌‌కు పోతే ఓ మహిళ ప్రాణం పోయింది. ఆగ్రహించిన మృతురాలి కుటుంబసభ్యులు, బంధువులు హాస్పిటల్ ఎదుట ఆందోళనకు దిగారు. బాధిత కుటుంబ సభ్యుల వివరాల ప్రకారం.. హనుమకొండ జిల్లా భీమదేవరపల్లి మండలం ముల్కనూరుకు చెందిన బొమ్మిశెట్టి సుమలత(29)కు గురువారం కడుపునొప్పి రావడంతో భర్త రమేశ్ హనుమకొండలోని ఓ ప్రైవేట్హాస్పిటల్‌‌కు తీసుకెళ్లాడు. పరీక్షించిన డాక్టర్లు ఆమెకు శుక్రవారం ఆపరేషన్ చేశారు.
ఆదివారం సుమలత ఆరోగ్యం క్షీణించిందని, ట్రీట్‌‌మెంట్అందిస్తున్నామన్న డాక్టర్లు.. సాయంత్రం 4గంటలకు చనిపోయిందని చెప్పారు. దీంతో బాధిత కుటుంబ సభ్యులు ఆసుపత్రి ఎదుట ఆందోళనకు దిగారు. మృతురాలి భర్త రమేశ్మాట్లాడుతూ డాక్టర్ల నిర్లక్ష్యం వల్లే తన భార్య ప్రాణం పోయిందని ఆరోపించారు. కడుపులో సమస్య ఉంటే ఆపరేషన్ చేసిన డాక్టర్లు కండ్లకు కాటన్ ఎందుకు పెట్టారో అర్థం కావడం లేదన్నారు. సుమలత ఏ సమస్యతో చనిపోయిందో కూడా తెలియడం లేదని వాపోయారు. సుమలత మృతిపై విచారణ జరిపించి తమకు న్యాయం చేయాలని డిమాండ్ చేశారు. పోలీసులు వచ్చి బాధిత
కుటుంబ సభ్యులకు నచ్చజెప్పారు.
