ఫిబ్రవరి మొదటి వారంలో టాలీవుడ్ బాక్సాఫీస్ వద్ద చిన్న సినిమాల జాతర మొదలైంది. భారీ బడ్జెట్ సినిమాలు, స్టార్ హీరోల హడావుడి లేకపోయినా.. విభిన్నమైన కథాంశాలతో, కొత్తదనాన్ని కోరుకునే ప్రేక్షకులను ఆకట్టుకోవడానికి ఏకంగా ఆరు చిత్రాలు ఫిబ్రవరి 6, 2026న థియేటర్లలోకి వస్తున్నాయి. కంటెంట్ బాగుంటే చాలు, నటీనటులతో సంబంధం లేకుండా బ్రహ్మరథం పట్టే సినీ ప్రియుల కోసం ఈ వారం సందడి ఒక రేంజ్లో ఉండబోతోంది. హారర్, సస్పెన్స్, ఎమోషన్, యూత్ ఫుల్ లవ్ స్టోరీస్ ఇలా విభిన్న జానర్లతో ఈ చిత్రాలు బాక్సాఫీస్ వద్ద తమ అదృష్టాన్ని పరీక్షించుకోబోతున్నాయి.
యుఫోరియా (Euphoria): సామాజిక ఇతివృత్తంతో గుణశేఖర్ అడుగు
ప్రముఖ దర్శకుడు గుణశేఖర్ గడిచిన కొన్నేళ్లుగా పౌరాణిక, చారిత్రక చిత్రాలకు కేరాఫ్ అడ్రస్గా నిలిచారు. అయితే, ఇప్పుడు ఆయన రూటు మార్చి నేటి సమాజంలోని అత్యంత భయంకరమైన ‘డ్రగ్స్’ సంస్కృతిని ఇతివృత్తంగా తీసుకుని 'యుఫోరియా'ను రూపొందించారు. సీనియర్ నటి భూమిక, సారా అర్జున్ ఇందులో కీలక పాత్రల్లో కనిపిస్తుండగా, దర్శకుడు గౌతమ్ వాసుదేవ్ మీనన్ పవర్ఫుల్ పోలీస్ ఆఫీసర్గా నటించడం విశేషం. కాలభైరవ సంగీతం ఈ చిత్రానికి ప్రధాన ఆకర్షణగా నిలవనుంది.
హనీ (Honey): నవీన్ చంద్ర మార్క్ హారర్ థ్రిల్లర్
వైవిధ్యమైన పాత్రలతో తనకంటూ ఒక గుర్తింపు తెచ్చుకున్న నవీన్ చంద్ర ఇప్పుడు సైకలాజికల్ హారర్ మూవీ 'హనీ'తో పలకరించబోతున్నారు. 'పలాస' ఫేమ్ కరుణ కుమార్ దర్శకత్వంలో తెరకెక్కిన ఈ చిత్రం సమాజంలోని చీకటి కోణాలను ఆవిష్కరించబోతోంది. దివ్య పిళ్లై, బిగ్బాస్ ఫేమ్ దివి ఇతర పాత్రల్లో నటించిన ఈ మూవీపై థ్రిల్లర్ ప్రియుల్లో భారీ అంచనాలు ఉన్నాయి.
సుమతీ శతకం: బిగ్బాస్ అమర్దీప్ అదృష్టం
బుల్లితెరపై అమితమైన ఫ్యాన్ బేస్ సంపాదించుకున్న అమర్దీప్ హీరోగా నటించిన చిత్రం ‘సుమతీ శతకం’. ఎం.ఎం. నాయుడు దర్శకత్వంలో రూపొందిన ఈ సినిమాను ప్రతిష్టాత్మక మైత్రీ మూవీ మేకర్స్ డిస్ట్రిబ్యూట్ చేస్తుండటం సినిమా రేంజ్ను పెంచింది. టేస్టీ తేజ, మహేష్ విట్టా వంటి కామెడీ నటులు ఉండటంతో ఇదొక పూర్తిస్థాయి ఎంటర్టైనర్గా ఉండబోతోందని తెలుస్తోంది.
విత్ లవ్ (With Love): సౌందర్య రజినీకాంత్ నిర్మాణంలో..
దర్శకుడు అభిషన్ జీవింత్ హీరోగా తన అదృష్టాన్ని పరీక్షించుకుంటున్న చిత్రం 'విత్ లవ్'. 'ఛాంపియన్' ఫేమ్ అనస్వర రాజన్ కథానాయికగా నటించిన ఈ చిత్రానికి రజినీకాంత్ కుమార్తె సౌందర్య రజినీకాంత్ నిర్మాతగా వ్యవహరించడం ట్రేడ్ వర్గాల్లో ఆసక్తిని రేకెత్తిస్తోంది. ఒక స్వచ్ఛమైన ప్రేమకథగా తెలుగు, తమిళ భాషల్లో ఈ చిత్రం విడుదలవుతోంది.
శ్రీ చిదంబరం గారు: కొత్త ప్రతిభకు పెద్దపీట
యంగ్ హీరో వంశీ తుమ్మల, సంధ్యా వశిష్ఠ జంటగా వినయ్ రత్నం దర్శకత్వంలో రూపొందిన చిత్రం ‘శ్రీ చిదంబరం గారు’. కొత్త వాళ్లను ప్రోత్సహించాలనే ఉద్దేశ్యంతో నిర్మాత చింతా గోపాలకృష్ణారెడ్డి నిర్మించిన ఈ చిత్రం ఫిబ్రవరి 6న ప్రేక్షకుల ముందుకు వస్తోంది. ఇప్పటికే విడుదలైన ట్రైలర్ ప్రేక్షకులను ఆకట్టుకోవడంతో పాటు, ఇదొక విభిన్న కథాంశంతో సాగే సినిమా అని మేకర్స్ నమ్మకంగా చెబుతున్నారు.
ఎర్రచీర: సెంటిమెంట్, హారర్
మదర్ సెంటిమెంట్, హారర్ ఎలిమెంట్స్తో తెరకెక్కిన చిత్రం ‘ఎర్రచీర’. కారుణ్య చౌదరితో పాటు సీనియర్ నటుడు రాజేంద్రప్రసాద్ మనవరాలు బేబీ సాయి తేజస్విని ఇందులో ప్రధాన పాత్రలు పోషించారు. సుమన్ బాబు దర్శకత్వంలో రూపొందిన ఈ చిత్రం ఫ్యామిలీ ఆడియన్స్ను ఏ మేరకు మెప్పిస్తుందో చూడాలి.
ఈ ఆరు సినిమాలు ఒకే రోజు విడుదలవుతుండటంతో థియేటర్ల వద్ద పోటీ నెలకొంది. కంటెంట్ ఉంటే ప్రేక్షకులు దేనికైనా జై కొడతారు. ముఖ్యంగా నవీన్ చంద్ర 'హనీ', గుణశేఖర్ 'యుఫోరియా' చిత్రాలపై ట్రేడ్ వర్గాల్లో పాజిటివ్ బజ్ ఉంది. మరి ఈ ఫిబ్రవరి వీకెండ్లో ఏ సినిమా బాక్సాఫీస్ వద్ద సత్తా చాటుతుందో చూడాలి!
►ALSO READ | The Raja Saab OTT Release: ప్రభాస్ క్రేజ్కు జియో హాట్స్టార్ సర్వర్లు షేక్.. ‘ది రాజాసాబ్’ రిమైండ్ మి రికార్డులు!
