- ఇప్పటికే ద్వితీయ శ్రేణి లీడర్లు, స్థానిక ప్రజాప్రతినిధులు జంప్
- తాజాగా పార్టీని వీడిన జహీరాబాద్ఎంపీ బీబీపాటిల్
కామారెడ్డి, వెలుగు: కామారెడ్డి జిల్లాలో ఓ వెలుగు వెలిగిన బీఆర్ఎస్అసెంబ్లీలో ఓటమితో క్రమంగా తన ప్రాభావాన్ని కోల్పోతోంది. అసెంబ్లీ ఎన్నికలకు ముందు నుంచే గులాబీ పార్టీకి వరుస దెబ్బలు తగులుతున్నాయి. అసెంబ్లీ పోలింగ్కు ముందే పలువురు స్థానిక ప్రజాప్రతినిధులు, ద్వితీయ శ్రేణి లీడర్లు ఆ పార్టీని వీడారు. అసెంబ్లీ ఎన్నికల్లో ఆ పార్టీ జిల్లాలో ఘోర పరాభవాన్ని చవిచూసింది.
జిల్లాలోని నాలుగు అసెంబ్లీ నియోజకవర్గాల్లో ఒక్క స్థానంతోనే సరిపెట్టుకున్నారు. పార్టీకి మంచి పట్టు ఉందని భావించి గులాబీ బాస్ కామారెడ్డిలో పోటీ చేయగా ఈయనకు కూడా ఓటమి తప్పలేదు. ఏకంగా పార్టీ అధినేతే ఓడిపోవడం గులాబీ శ్రేణులను విస్మయానికి గురి చేసింది. అసెంబ్లీ ఎన్నిటకల్లో కామారెడ్డి, ఎల్లారెడ్డి, జుక్కల్ నియోజకవర్గాల్లో బీఆర్ఎస్ క్యాండిడేట్లు ఓడిపోగా, కేవలం బాన్సువాడలో మాత్రమే మాజీ స్పీకర్ పోచారం శ్రీనివాస్రెడ్డి విజయం సాధించారు.
దీంతో బీఆర్ఎస్ పార్టీ నుంచి లీడర్లు, ప్రజాప్రతినిధులు క్రమంగా కాంగ్రెస్, బీజేపీలో చేరుతున్నారు. శుక్రవారం జహీరాబాద్ఎంపీ బీబీపాటిల్ సైతం బీఆర్ఎస్ పార్టీకి రాజీనామా చేసి బీజేపీలో చేరారు. ఇప్పటివరకు స్థానిక ప్రజాప్రతినిధులు, లీడర్లు మాత్రమే పార్టీలు మారగా, తాజాగా ఎంపీ పార్టీ మారడంతో పెద్ద లీడర్లను సైతం ప్రభావితం చేసేలా కనిపిస్తోంది.
నియోజకవర్గాల్లో పెరిగిన వలసలు
కామారెడ్డి, ఎల్లారెడ్డి, బాన్సువాడ, జుక్కల్ నియోజకవర్గాలకు చెందిన పలువురు స్థానిక ప్రజాప్రతినిధులు, మండల స్థాయి, గ్రామ స్థాయి బీఆర్ఎస్లీడర్లు కాంగ్రెస్ పార్టీలో చేరుతున్నారు. కామారెడ్డిలో కేసీఆర్ పోటీ చేసిన అసెంబ్లీ ఎన్నికల టైమ్లోనే ఎంపీపీ, జడ్పీటీసీ, మున్సిపల్ కౌన్సిలర్లు కాంగ్రెస్లో చేరారు. కాంగ్రెస్ పార్టీ రాష్ట్రంలో అధికారంంలోకి రావడంతో వలసలు మరింత పెరిగాయి. కామారెడ్డి మున్సిపాలిటీకి చెందిన 17 మంది బీఆర్ఎస్ కౌన్సిలర్లు సైతం కాంగ్రెస్లోకి వెళ్లారు.
బీజేపీలోకి ఎంపీ బీబీ పాటిల్
జహీరాబాద్ ఎంపీ బీబీ పాటిల్ శుక్రవారం బీజేపీలో చేరారు. కొద్దిరోజులుగా ఆయన పార్టీ మారుతారంటూ విస్తృతంగా ప్రచారం జరిగింది. 2014, 2019 ఎన్నికల్లో పాటిల్ బీఆర్ఎస్ నుంచి పోటీ చేసి గెలిచారు. ఎంపీ బీబీ పాటిల్ఇదే జిల్లాలోని జుక్కల్నియోజకవర్గానికి చెందినవారు. బిజినెస్ మ్యాన్ అయిన పాటిల్2014లో అనూహ్యంగా బీఆర్ఎస్ టికెట్ దక్కించుకొని వరుసగా రెండుసార్లు ఎంపీగా గెలిచారు.
ఈయనకు బీజేపీ ముఖ్య నేతలతోనూ సన్నిహిత సంబంధాలు ఉన్నాయనే ప్రచారం ఉంది. అసెంబ్లీ ఎన్నికల తర్వాత పార్టీ మారాలని ఆయన అనుచరులు పాటిల్పై ఒత్తిడి తీసుకొచ్చారు. స్టేట్లో బీఆర్ఎస్ అధికారం కోల్పోవడంతో లోక్సభ ఎన్నికలకు ముందే ఆయన బీజేపీలో చేరారు. బీఆర్ఎస్కు రాజీనామా చేస్తున్నట్లు శుక్రవారం లెటర్ రిలీజ్ చేసిన కొన్ని నిమిషాలకే ఢిల్లీలో బీజీపీ పెద్దల సమక్షంలో ఆ పార్టీలో చేరారు. ఎంపీ అనుచరుల్లోనూ కొందరు పార్టీ మార్పుపై సమాలోచనలు చేస్తున్నారు.
