హైదరాబాద్: తెలంగాణ ఉద్యమంలో పీసీసీ చీఫ్ మహేష్ కుమార్ గౌడ్ ఎక్కడున్నాడని బీఆర్ఎష్ వర్కింగ్ ప్రెసిడెంట్ కేటీఆర్ చేసిన వ్యాఖ్యలకు టీపీసీసీ జనరల్ సెక్రెటరీ చనగాని దయాకర్ కౌంటర్ ఇచ్చారు. కేటీఆర్ లాగులు తొడుక్కోకముందే మహేష్ కుమార్ గౌడ్ విద్యార్థి రాజకీయాల్లో ఉన్నారని.. నిబద్ధతతో పనిచేసి ఆయన పీసీసీ చీఫ్ అయ్యారని అన్నారు. 2006కు ముందు కేటీఆర్ తెలంగాణలో లేడని.. అంట్లు తోముకుంటూ అమెరికాలో ఉన్నాడని విమర్శించారు. 2006 తర్వాతనే కేటీఆర్ రాజకీయాల్లోకి వచ్చాడని.. అయ్య చాటు బిడ్డగానే కేటీఆర్ ప్రజలకు తెలుసన్నారు.
తెలంగాణ రాష్ట్రం కోసం విద్యార్థులు, సకల జనులు పోరాటం చేశారని పేర్కొన్నారు. తెలంగాణ ప్రజల ఆకాంక్షలను గుర్తించిన తర్వాతనే కరీంనగర్ గడ్డపై ఇచ్చిన మాట ప్రకారం యూపీఏ చైర్ పర్సన్ సోనియాగాంధీ తెలంగాణ రాష్ట్రం ఇచ్చారని చెప్పారు. కాంగ్రెస్ ప్రత్యేక తెలంగాణ రాష్ట్రం ఇస్తేనే కేసీఆర్ సీఎం అయ్యారని అన్నారు. కేటీఆర్ పోరాటం చేస్తే, బట్టలు చింపుకుంటే తెలంగాణ రాలేదని ఎద్దేవా చేశారు. కేసీఆర్, కేటీఆర్ మళ్లీ తెలంగాణ సెంటిమెంట్ రగిల్చి చలి కాచుకోవాలని చూస్తున్నారని ఆరోపించారు.
తెలంగాణలో కాంగ్రెస్ ప్రజా ప్రభుత్వం ఉద్యమకారులను గౌరవించిందని.. ప్రజా ప్రభుత్వంలో పాటకు సీఎం రేవంత్ రెడ్డి పెద్ద పీట వేశారని చెప్పారు. దీక్ష దివాస్ పేరుతో కేటీఆర్.. సీఎం రేవంత్ రెడ్డి, పీసీసీ చీఫ్ మహేష్ కుమార్ గౌడ్పైవిమర్శలు చేశారని ఆగ్రహం వ్యక్తం చేశారు. కేటీఆర్ ఇకనైనా అహంకారపు, బలుపు మాటలు తగ్గించుకోవాలని హెచ్చరించారు. కేటీఆర్కు చింత చచ్చినా పులుపు చావలేదని విమర్శించారు.
